MDTOA-i Mkg-Mariani lenmang yanglushiba maparen tenzüktsü anogo 30 züngzüktsür

Mokokchung, Aug. 18 (TYO): Mokokchung-Mariani highway lenmang yakta yanglushitsü asoshi Mokokchung District Truck Owner Association (MDTOA)-i Nagaland Chief Engineer (P.W.D National Highways) dangi tezüluba ka agütsüogo, ta MDTOA osang ka ajanga metetdaktsü.
Mokokchung-Mariani highway lenmang ya Mokokchung, Tuensang aser Zunheboto district nüburtem atema taküm lenmang lir aser district asemsanger taküm aliba (livelihood) jenjangji yangi dang nendaka lir, ta shidi nung shia lir.
Ajisüaka, iba lenmang ya sorkari küm talangka anepalu mesüi toktsüba yong taoba mapang dang nungi tang tamajungba kümogo. Iba ajanga gari tulu tila kata mejajateti district asemsangertem okrongteper. Talisa khu abenba gari kiburtemi iba timtemji ajurudar. Iba lenmang nung khu abendang garitem mayanglushitettsüsa raksaogo, ta parnokisa metetdaktsü.
Iba lenmang nung nübur nüngdak peridaktsütsü asoshi anogoshia khu abenba gari taret 500 nungi 700 shi jajar. Lenmang majungba ajanga gari kiburtemi nübur nüngdaktem meperidaktsüteter. Anungji, iba lenmang ya sorkari yakta yanglushitsü nüngdaker, ta MDTOA-isa metetdaktsü.
Anungji, “Mokokchung-Mariani lenmang ya district asemsanger tajangzük asoshi yakta yanglushidaktsüner,” ta parnokisa shia lir.
“Onoki mepishia züluba shiti ya tamakok aludaktsüra, aser anogo 30 tsüngda lenmang yanglushiba maparen metenzükra, lenmang nokdangba (Chaka Bandh) maparen inyaktsüsa akümtsü aser iba dak sentakba nung timtem kar danga adokra, MDTOA pur khuret masütsü,” ta parnokisa Chief Engineer dangi züluba shidi nungji shia lir.