Measles vaccine ajanga tanurtem Covid nungi kümzüktsüa akok

New Delhi, June 23 (Agencies): India nung coronavirus wave tasembuba mapang nung tanurtem mejungi kongshitsüa akok, ta bilema state aikati renemshiba mapang research agirtemi iba wara nokdangtsü atema lenla ajak nungi asadangdar.

Study tasen ka ajanga ashiba agi, Measles Containing Vaccines (MCVs) ya India nunger routine immunisation programme nung lir, aser iba vaccine ya ajanga tanurtem SARS-CoV-2 virus nungi shilem 87.5 agi kümzüktsü.

BJ Medical College, Pune nung research agirtemi, measles indang vaccine ajanga tanurtem coronavirus nungi shilem 87.5 agi kümzüktsüa akok, ta metetdaktsü. Kasa study ajangasa, arrshi küm 18 ser tekübok tanurtem measles vaccine magirtem dang nungibo vaccine agir tanurtem dak coronavirus tashidak temaitsü tajemba liasü, ta bushitet.

Iba study ya arrshi küm 1-17 tsüngda tanur 548 dak agia liasü, aser item tanurtem rongnung tamalen coronavirus puteta alir aser kodanga meputetba tanurtem densema lir.

Iba study ya Department of Community Medicine nungi BJ medical college researchers aser paediatrician, Dr Nilesh Gujar nungeri agi aser Serum Institute of India (SII)-i senotsü agi yaria liasü. Iba study ya jungjunga jangjatsü atema clinical trials agitsü nüngdaker.

Iba study ya jungjunga agia kuli tejangja angu nungbo coronavirus wave tasembuba mapang nung tanurtem wara nungi kümzüktsü.