MEC MFI kübok nisung 13 nem micro loan teyari agütsüogo

Mokokchung Entrepreneurs Consortium Micro Finance Initiative (MEC MFI) mapatong kübok Mokokchung nung business inyaker par 13 nem micro loan teyari agütsür külen, tongti tesemdanger Mokokchung ADC & MMC Administrator, Bendanglila den MEC ketdangsertem külemi tangokba noksa nung angur. Mokokchung, July 5, 2016.

Mokokchung, July 5 (TYO): Mokokchung Entrepreneurs Consortium (MEC) teloki achayanga sen terara aputsüba maparen ‘Micro Finance Initiative (MFI)’ mapatong kübok Mokokchung nung business inyaker lisopur parnok 13 nem Micro Loan teyari agütsüba sentong ka Mungulbarnü yangi Mokokchung Municipal Council conference hall agiogo.
Iba sentong nung tongti tesemdanger MMC Administrator & ADC Mokokchung, Bendanglilai jembidang, asenok liso nisungtemi bank balala nungi senbo (loan bo agir) saka aikati sentsüh maor, iba ya lokti nung tebilemtsü ulura ka kümogo aser iba yongji Bank-i joko loan aika magütsüi sota ayur, ta metetdaktsü.
MEC-i sen terara aputsüba maparen 10 bubaren tashi takok ngua inyakba den liso business inyakertem ajungshiba asoshi pelar, ta laisa MEC ketdangsertem tenüng sanga ashi.
“Liso nisung aikati sen apur business tenzüktsü aser manger mesangwa dang libaliro (living standard) ajungbena melenshiba angur, anungji, iba yimyaji melenshitsüla”, ta laisa ajungshia liasü.
Laisa customer den jembishinü jungdaktsünüba olen ka ashidang, liso nisung aika talir den anepalua jembishinüba nung ajema lir, anungji, “customer care” tsütsü jungdaktsüner.
MEC telok ya Mokokchung nung business inyaker lanur ishikati lungjemer tentet. Iba telok ya nija tajangzük bushitsü tebilemba nung masü saka Mokokchung nung business inyaker lisopur kati ka den yaritepa business jenjang ajungkettsü nükjidong yur tenzükba lir, ta MEC mendenbuba Tsükti Lkri metetdaktsü.
Micro Finance Loan teyari ya shirnoki ochi shia business shitak inyaker item pur nem agüja arur. Saka tan terbubaren nung yabo tejak tasen pur kata medeni tejen pur shirnoki junga inyaktet, item pur dang shima agütsü, ta paisa jangjashitsü.
Tang tashi nung MEC kübok Micro Finance Initiative mapatong ajanga nisung noklang ana ser tema nem Micro Loan teyari agütsüogo. Par telokisa mapang shia business aser senotsü amshiyim dak sentakba nung shisatokden sentong balala ayongzüka akar. Iba den ano nüngdakba pur nem business inyaktsü shisa len  sayuba maparen ka tenzüka odaki.”’