Mecca kübok Grand Mosque nung nisung 107 asü; 238 shi yiru

Saudi Arabia kübok Mecca nung tentetba Grand Mosque nung kisüjensü maparen nung osettsüset tulu ajungshitsü asoshi amshiba crane ka laoa alidak anasa Saudi emergency ketdangsertem nokdaka aliba noksa nung angur. (Mecca, September 12)

Riyadh, September 12 (Agencies): Mecca nung tentetba Grand Mosque nung osettsüset taret ajungshitsü asoshi amshiba crane ka yashi Hokolbar nü laoa lendong atalokba osang ka Saudi Arabia’er Civil Defence Authority (CDA)-i tanü Honibar nü metetdaktsüogo.
Islam tamangba yimsü benshirtemi kümshi külem küja amongba Haj sentong asoshi terenemshiba agidang iba crane-ji laoa lendong atalok ta General Suleiman al-Amr, Director General, CDA-i ashi.
“Yashi atalokba lendong nung nisung 107 asüba aser nisung 238 shi yiruba osang tang tashi nung jangjaogo. Tzünglu kanga sashia aruba den külemi, muponga kanga sashia aonba ajanga crane-ji laoba osanga jangjaogo,” ta pai osang jangjashitsü.
Yashi laoba crane-ji külem küjartemi par tekülem sentong agia lunga jajadak, Kaaba nung züngok ta Mecca aser Medina na nung tentetba mosque ketdangertemia metetdaktsüogo.
Kaaba-ji alima tesem balala nung alir Muslim nunger nisung billion 1.6 shi Mecca-i kümshi oa par külem küja agi sarasademdak lir.
Islam tamangba yimsü benshir nisung million aikati par külem küja sentong agitsü asoshi kümshi Grand Mosque semdangdang parnoki timtem majurudaktsütsü asoshi Saudi sorkari nungdakba terenemshibaren kanga junga agiba osang bushiteta lir.
Haj külem küja sentong agitsüpur nem par sentong sadema agidaktsütsü nükjidong nung Saudi sorkari Grand Mosque tuluba küma yanglushitsü mechi yaküm, 2014 kümbo Haj külem küja agitsüpurtem tajemba arudaktsüba osanga bushitetogo.
Alima ajunga nung tamangba yimsü den sentakba sentong tulutiba agidak, Grand Mosque nung nisung tali küma nisung jenti ajemsetba lendonga taoba mapang atalokba osang bushiteta lir.