Medemeri medemer chiradaktsür

Yisu Khrista taküm alidang asenok dang kanga nendaka ashiba o kaji medemer o medemer na meimteptsü aser yariteptsü asoshi shia lir. Iba o ji Yohan tapu 15 tekong 12 nungi 15 tashi nung kanga junga shia angur. Iba kasaji Apijemtsü Shin tapu 27 tekong 17 nung ashir, ” merangi merang chiradaktsür, yamaji nisungi nisung chiradaktsür.” Tanü asenoki item Lai tekong nungi tagitsü o kar agiteta agitsü merangdang, tamasa peisasa pei dang, ” kü medemerji shiba ?” ta asüngdangmadi.  Asenok taküm nung anogo shibo pelaa malir mesüra teti dangbo kaa-itta malir mesüra tetibo anema malir, iba ama shisabolu aser azüngmeyak mapang Tsüngremi asenok yaritsü asoshi medemer agütsür. Aji oda, asen taküm nung asenok nem Tsüngremi moatsüba temoatsütem rongnung kaji medemer tajung asütsü. Medemer tajungi asen timtem nung alidang yarir, tezüdanga aliba mapang tashi itshidakja ajungshir aser len meshitaki ooya aliba mapang kecha marendaki arütsür.  Aji oda, nisung shibai na Tsüngremi yangluba nükjidong tongteta alitsü asoshi ajungshir aser yarir, pajiang nü medemer shitakbaji asütsü. Nisung aikati tsürabur adianui ashiba mangar saka medemertemi ashibabo angar, iba jagi nisung aika medemer tajung süra tajung aser tamajung süra tamajung akümer. Aji oda, merangi merang chiradaktsüba ama ano merangi merang raksatsütsü akokba mesüka nisungia nisung ka yanglutsütsü mesüra raksatsütsü akoker. Tanü asenok aika tai temenen lenmang nung senzüa aliba ya, ashiko, medemertemi anisaba ajanga asütsüa akok, achiajem nung mazüoktetba ya medemertemi yimya sübadaktsüba asütsüa akok mesüra shi azü mazüok jajabaji medemertem sülen anidakba ajanga asütsüa akok. Item ama medemerji Tsüngrem nungi masü saka temeneni asenok atidangtsü yokba medemertem asütsü. Aji oda, Laishiba nung tajungi tamajung akoktsü ajungshibaji, medemer tajungi medemer tamajung temenen lenmang nung jajaya alibatemji akoktsüba indanga dena  ashir ta asenoki angatetdi. Laishiba nung medemer tajungi medemer tajung yariba otsü ka 1 Samuel 19 nung shia angur. Jonathan ya Saul chuba’er jabaso, anungji tebu melen pa chuba akümtsü koka liasü, ajisüaka pa chuba akümtsü bilemtsü melen, pai par medemer David dang Tsüngremi mulungba nung jajatsü ajungshia yari. Iba ama medemer ka asen taküm nung alitsü kanga nüngdaker. Medemer tajungi timtem aser shisabolu mapang yariba dang masü saka Tsüngrem anasai asenokji bener oa yutsür. Asenok tasü mait mesüra mechira aliba mapang chiradaktsür aser tasü itta kümdaktsür. Yisuia pa den külemi jajatsü medemer shimdang pei mekokmein ajak toktsür Tsüngremi mulungba nung jajatsü purtem shimtet. Asenoka taküm nung medemer shimdang kanga kümdangtsü tim. Atangji, kenyongi tarak maket, tashishitsü mali tabensa nisung ka asen medemer asütsü asoshi mengutettsüa akok, saka nisung ka dak tashimait liaka, Tsüngremi mulungba len anidaktsü mulungba aser Tsüngrem akümtsübuba temulungjang adenba nisung ka süra, pa mesüra laji asen asoshi medemer tajung asütsü. Alima rongsen tsütsü makamait nung yariteper nisungbo medemer tajung masütsüa akok, saka shibai asen teti Tsüngrem anasai anir arur, shibai asen Tsüngrem nungi mepiladaktsür aser shibai temeim mapa inyaktsü sayur, pa mesüra lajiang asenok asoshi medemer tajung asütsü. Tangar asoshi iba ama medemer tajungji asenok asütsü merangdi. Yisui mulungba ama, asenok kati ka den meimtepdi aser asenoki tangar danga pei ama meimtsü mapa agi sayudi. Merangi merang chiradaktsüba ama asenok medemer o medemer na ajungshitepdi aser külemi longjemer Tsüngrem aser nisung asoshi mapa tajung tulu inyaktsü merangdi.