Medemertem Shimtetang (T.Ken 119:57-64)

Medemertem akaba nung ajaki pelar. Asenoki parnokji nüngdaker. Ken züluri Tsüngrem O ji pa medemer ta ashi. “Shirnoki ne akhüm tsübur aser shirnoki ne ozüngtem benshir, parnok ajak medemerji ni lir” (t.63). Tsüngrem O i ashiba ama, pai pa medemertem shim. Asenok temetetteper aika lir saka medemerbo ishika dang lir. Mapang ajak nungbo nai mejembiba medemer kar lir. O mejembi mapang talangka külemi alitsü akok, aji saka temulungjangbo lungjema lir. Medemer kar denbo nai metsübui jembitetba medemertem lir. Nai ne mulungjang nung khuret magütsütsü akok, aser na pa den aliba agi nübusen tajungba asür.
Tsüngrem asenok tembar tajungtiba lir. Abraham dang Tsüngrem tembar ta aja, asenoka Pa tembar asütsü akok. Yisui nütsüngtem dang ashi, “Ni nenok dang kilir ta majar. Ni nenok dang tembartem ta ajar” (Yn. 15:15). Tembartemi kati ka den jembiteper. Aser asenoki Tsüngrem den jembira aser Pa O ajanga Pai asenok den jembidaktsüra, Pa tsübur aser Pa ozüng ayurtem medemer asenok asütsü.
Tembarsüba tongtipang tetentangba kaji Tsüngrem O tsütsü kü tembar mulungsentsü kechi aji lir. Pai ibaji agizüker asü? Pai Tsüngrem O ji ochi ta agizüker asü? Pai Tsüngrem tsübur aser meimer asü?
Tsüngrem O ajanga ni Tsüngrem den tesendaktep shidak lira, ni nübur den tesendaktep shidak nung lir. Kü tembartem Tsüngrem tembartem alitsü. Laishibai iba dang pilaa aliba ta ajar. Laishiba O nung alibaji temoatsü taküm ka lir.
Ne medemer kümdanga shimang. Parnoki Tsüngrem tsübur asü masü? Laishiba angatetta alibaji tembar tajung ta züngshiang. Tesendaktepji asenok mapang rizüngba lir. Parnokji teti tatem maka asoshi ta züngshiang.