Medina-i Dominican Republic Tir tanabenren inyaktsü tenangzükba agiogo

Santo Domingo, August 17 (Agencies): Danilo Medina-i Dominican Republic linük Tir menden tanabenren abentsü tenangzükba yashi, Mongolbar nü agiogo.
Ita 3 tejaklen vote noklang nung shilem 62 ngua takok anguba sülen Medina-i Latin America aser Caribbean lima nung rongsenren terenlok tajungba aliba linük Tir menden abentsü tenangzüka tan agir lir.
“Asen linük nung technology den sentakba temelenshi aser terenlok lidaktsütsü nükjidong nung sorkar mapatong timba online ajanga inyakdaktsütsü alizüng lir. Ano, school tesayur aser kaketshir shia nem computer kaka agütsütsü nangzüker,” ta Medina-i Tir inyaktsü tenangzükba agiba sülen metetdaktsü.
Ano, par linük nung rongsenren terenlok tali lidaktsütsü nükjidong nung sensaka alir nisung 800,000 shi taküm jenjang tajungba kümdaktsütsü tenangzükba olen ka Dominican Liberation Party (DLP) yimtenren telok lenisang-i sangoktsü.
“Asen linük jenjang tajungba akümtsü asoshi maneni teinyaktsü jenti lir,” ta shia, par linüki ki o jen renemba, raliwalitsüren temaba jenjang nung ajungketba aser banking sabang nung tongti shilem agiba ajanga par linüki taoba küm, 2015 nung GDP terenlok noklang nung shilem 7 tashi anguba osang Medina-i lemsatepa liasü.
Ano külen, Medina tenu tetsürlai House of Deputies nung Tir menden abenba aser Senate Tir mendena pa pusemer yimsüsür kati abenba ken o nung ajemdaker opposition telok nungi yimsüsür aikati yashi tenangzükba agiba sentong nung shilem magiba osang jangjaogo.
Yashi sentong nung Venezuela Tir, Nicolas Maduro, Spain chuba, King Juan Carlos aser Ecuador Tir, Rafael Correa nungeri shilem agia liasü.