Medziphema jila nung Sekrenyi benjong among

Medziphema Town nung Sekrenyi benjongmong ayonger, Medziphema Town Mechü Krotho (MTMK) ketdangsertem aser Gaonburas tem külemi tangokba noksa nung angur.

Dimapur, Tsüklai/Feb. 25 (TYO): Angami Naga nunger asoshi tongtibang benjongmong, Sekrenyi ya Local Ground, Medziphema Town nung Medziphema Town Mechü Krotho (MTMK) aser Medziphema Town nung aliba Gaonburas (GBs) temi February 25, 2020 nü ayongzüka liasü, kong lenla balala nungi nüburtemi shilem agia liasü.
Iba benjongmong nung Medziphema yimtsüng nungi nüburtem pei tetsü-tebou mapang benshiba sübosolemtsü agir külemi benjong nung adentsü aruba ajanga Angamai Naga nunger sobaliba sayua liasü.
Iba sülen MTMK tir Akhoto Kuotsu-i sentong ani aser BC’A’MT nung pastor, Rev. Zhabu Terhüja-i Tsüngremer temoatsü jazüka sarasadem aser Head GB, Ningusie Meyase-i Sekrenyi benjongmong teratet ashi. Pai ashiba agi, iba benjong koba dang “Phousanyi” ta ajar, iba tetetzü “temang tasen” talisa kin nung teburtem dang ajaba lir, aser iba külem-keja tembangba sülen nisung temang aser tanüla tasen kümshia temoatsü angur ta amanger.
Kasa sentong nung Medziphema Baptist Khriesarüü Krotho (MBKK) ajanga ken ka aten aser Salhou Miasalhou aser medemertemia tetsü-tebuo ken ka aten aser yimtsü-yimbo Pfüneinyü Nakhro, Medziphema Village nung taoba chairman ajanga benjong salem bena nüburtem den tayongzükba o jembia liasü.
Kasa sentong nung Zhaleo Rio, IAS (Retd.), Advisor, Sericulture, Excise & Minority Affairs, Govt. of Nagaland aser Dr. Kevingulie Khro, taoba NPF candidate natia o jembia liasü.
Maneni Ward-6 nungi GB Salie Chüsi-i melepzüng o jembi aser Sepruoliezie Baptist Church, Medziphema Town pastor, Arho Niphi-i sentong tatem küma sarasademer lokti chiyongba mapang agia liasü.