Medziphema jila nung Swachh Bharat sentong ayonga agi

Dimapur, October 02 (TYO): Medziphema town council-i ayongzüka October 2, 2017 nü Main town junction, Medziphema nung ‘Swachh Bharat & Swachhta Hi Sewa’ sentong tatsüka agi; iba sentong nung tongti tejaokerji Municipal Affairs Govt. of Nagaland Parliamentary Secretary, Zhaleo Rio, (Rtd. IAS) liasü.
Tongti tejaoker o jembidang Zhaleo Rio-i iba sub division nung aliba nüburtem, melungtet teloktem aser ketdangsertemi ‘Swachh Bharat’ mapatong junga benoka inyakba atema tenüngsang agütsü.
Paisa sensotem dang merükmejuba mapatong nung shilem tajung agitsü aser merükmejua alitsü ajungshia liasü.
Pai ashiba agi, pa ya tongti tejaoker ka ama dang masü saka lenir ka ama pai anir iba mapatong inyaktsüla.
Merükmejuba mapatong takok angutsü atema nübur, melungtet teloktem, Arogotem aser lokti tentet balalai shilem agitsüla, ta paisa metetdaktsü.
Okila jembidang ADC Medziphema, Vikhweno Chale-i sub-division nung aliba nüburtem dang Medziphema jila merüka ayuba aser tebor junga ayuba ajanga asen aliba tesem merüka renlokdaktsütsüla, ta ayongzük.
Iba sentong ya Medziphema EAC, Sentilong Ozukum leniba nung agi aser Town Baptist Church ‘A’ Pastor, Rev. Zhabu Therhuja-i sarasadema liasü.