Medziphema nung Free Medical Camp agi

Dimapur, Monupii 08 (TYO): AIDS tashidak nungi kümzüktsü aser angadi medical camp ka 41 Assam Rifle den longjemer District AIDS Prevention & Control (DAPCU) ajanga Monupii/May 7, 2018 anogo SFS Higher Secondary School, Medziphema nung agi.
Iba camp nung Colonel Udai Bhanu-i kaketshirtem den HIV/AIDS tashidak ajanga timtemba, mozü agiba amala lemsatep. Pai kaketshirtem dang iba tashidak nungi kümzüka alitsü tekümdangtsü ashi.
Iba sentong nung seminar ka agi, kong ojembiri nütsüng arenba den HIV tashidak nungi kümzüka ayutsü aser mozü agiba indang tebilemtsütem lemsatep. Iba campaign ya nüburtem rongnungi HIV/AIDS tashidak nungi kümzüka alitsü aser samatsü nükjidong nung agi. Bikers temi iba sentong nung ajemdaker rally agiba ya Jalukie tashi aotsü.
Free Medical Camp Rally nung shilem ka ama bikers tem ya 41 Assam Rifle aser SFS kaketshirtemi agizüka liasü.