Medziphema nung Market Linkage Vehicle & Recovery Bike alem

Dimapur, June 06 (TYO): Department of Cooperation, Government of Nagaland-i ayongzüka June 4, 2019 nü CTC Medziphema nung Market Linkage Vehicle & Recovery Bike alemba sentong ka agiogo, ta ketdangsertem osang ka ajanga metetdaktsü.
Iba sentong nung jembidang Agriculture & Cooperation Minister, G. Kaito Aye-i, aluyimertem aser lokti tenzüktsüba ya maongka tulu, ta metetdaktsü.
Ato kilonser, Narendra Modi-i jembiba o lepshia minister-i, 2022 küm tashi nungbo aluyimertem income anasü agi timba akümtsü metetdaktsü.
Mapa inyakba society tem shimtsü aser aluyimertem anepalutsü; yim ka aser society ka ajanga yimtsüng rangben ajungkettsütsü atema ajungshitsüla, ta pai ashi.
Minister-isa, aluyimertem takok angutsü aser aluyimertem ajangzüktsü atema ketdangsertem ajaki inyaktsüla, ta ashi.
Paisa Regional Director, Anjani Kumar Srivastava leniba nung NCDC Guwahati-i society balala yariba atema pelaba lemsatep.
Pai ashiba agi, iba maparen nung tetsükdaktsü tulutibaji loan agiba sentsüh maoba ya lir, anungji pei sasa sen aazüka taküm litettsü atema society aser tajangzük angur ajaki mapang shidak nung loan sentsüh aotsüla.
Paisa alu nungi jenti züsentettsü aser asen nüburtem senmang wazüka ayutsü atema aluyimertem aser societies longjemtsü ayongzük.
NCDC Guwahati Regional Director, Anjani Kumar Srivastava-i asalentong aser programme balala indang tongmelang agi metetdaktsüba den külemi market linkage vehicles tajangzük, loan aser subsidy tajangzük aser aonosotsü züsenteta sen aazükba jenjang metetdakja liasü.
Commissioner & Secretary, L. Akato Sema, IAS leniba nung iba sentong agi aser Registrar of Cooperative Societies, Wepe Ritse-i tepela anküp o jembia liasü.
Phom aser Tuensang nungi Cooperative Society-i shilem balaka agi aser gari lemja sentong tembanga liasü.
Minister G Kaito Aye-i Peren, Kohima, Longleng, Tuensang aser Wokha district tem nung aliba societies aser department balala nem Market Linkage Vehicles (Bolero Pick-up) gari 9 aser Recovery Bikes 5 lema agütsü.