Medziphema nung North East Christian University campus lapok

Dimapur, March 12 (TYO) : Nagaland nung Khristan rejutem atema tajangzük tulu ka nguogo aser ibaji North East Christian University indang campus ka lapokba lir.
March 10, 2017 nü Council of Baptist Churches in North East India (CBCNEI) President, K. C. Momin-i iba campus lapokja liasü. Iba sentong nungsa Higher & Technical Education, Parliamentary Secretary, Deo Nukhu-i tetushi süa jaoker ama shilem agi.
NECU indang campus ji Medziphema jila nungi kilometer 3.5 shi pilar lir.
“British Missionary Society nungi Baptist Missionary, James Roy-i 1829 nung Guwahati nung mission school ka lapokba ajanga North East nung mezüngbuba shisaliok reju lapoktsü. Iba sülen 1836 nung America nunger Missionary ana- Rev. Nathan Brown aser Rev. Olive Carter nati North East tesem balala nung Baptist maparen inyaktsü tenzük,” ta NECU PRO Chancellor, Rev. Dr. A. K. Lama-i NECU indang alizüng osang metetdaktsüdang ashi.
Iba mapang nungi Baptist-i North East loktiliba asoshi mapa jenti inyakogo aser graduate jenjang tashi shisaliok rejutem lapok. Ajisüaka, Baptist shisaliok rejutem higher educational jenjang nung ajungkettsü atema atsüdaka liasü, ta paisa ashi.
2008 küm pa CBCNEI nung General Secretary inyaktsü tenzükba sülen nungi arogotem longjemer tamangba tsütsü telongjem ajanga shisaliok maparen inyaktsü junger ta tangatetba aru, ta Rev. Dr. A. K. Lama-isa shisem.
NE tesem nung takotet nisungtem aser tangazükdak liaka, nisung aikati tangalen ang oa azünger. Iba ya senotsü endokba dang masü saka northeast nung human resources mamshiba khuret ka lir. Iba khuret atema pai CBCNEI kübok aliba seminary 8 nungi principal tem dang shisaluyimba tsütsü teinyaktsütem bilemdangtsü asüngdang, ta Arogotemi Baptist University ka kübok shisaliok rejutem nungita yaritsü junger ta bilem. CBCNEI kübok Baptist arogo 7000 ajanga shisaliok reju ka lapoktettsü ta shisashirtemi bushitet aser ibaji CBCNEI indang expertise committee-ia mulunga agizük, ta Rev. Dr. A. K. Lama-i ashi.
April 2010 nung William Nagar nung 60 buba Annual General Convention alidang iba onük benok aser agizüka ayu. Iba sülen August 26-27, 2010 tashi Shalom Bible Seminary, Zubza nung CBCNEI tongti lennirtem aser Convention 6 nungi mongin nisungtem adenshia senden ka amendang, iba University dang NECU ta ajatsü lemteta ayu, ta paisa shisem.
Nagaland nung taoba chief secretary aser Governor Council, NECU züngsem, Alemtemshi IAS-ia o jembidang, aliji acre nung sen 50,000 agi alizük ta metetdaktsü aser iba atema Medziphema Village Council dang pelar ta pai shisem.
Alemtemshi-isa NECU Campus Development indang osang metetdaktsüdang, Medziphema village Chairman-i NECU renlokra, Medziphema-a renloktsü ta ashiba olen ka ashi.
Sentong nung Parliamentary Secretary, Deo Nukhu-ia o jembidang, Medziphema yimertem aser village council chairman-i Khristan mapa inyaktsü atema ali tenla agütsüba atema pelaba ashi aser Tsüngremi parnok nem temoatsü agüjang ta moatsü.
“North East Christian University (NECU) ya alima nung University tajungtiba akümtsü imlar. Tang North East nung North East Hill University (NEHU) lir saka NECU ji NEHU campus dang nungi tajungba asütsü ta bilemer,” ta Deo Nukhu-isa shisem.
Paisa American Baptist Churches dang NECU den medemer akümba atema pelaba metetdaktsü aser Friends of NECU, USA tenüng nung Rev. Taku Longkumer aser pa kinungtsü adenba atema pelaba shisem.
“India nung theological students teimbaka scholarship manguba ajanga timtemer. India nütsüng yongsük nung Khristantem shilem 2.5 tekübok lir aser asenok ya nübo nung tangar memenepertem lir saka ni akoba tashi yariteptsü,” ta Parliamentary Secretary-isa ashi.
Deo Nukhu-isa tawa pai Delhi-i aodang Joint Secretary of Minority Affairs den ajurutepba osang lemsatepdang, “Joint Secretary ji Nagaland IAS cadre ka lir aser pai UGC nungi scholarship manguba kaketshirtem Minority Affairs nungi yaritsü ta nangzük,” ta ashi.
Naga nunger theology azüngertemi Minority Affairs indang website nungi form agizüktsü akok mesüra Directorate of Higher and Technical Education, Kohima nungi form angutsü, ta paisa metetdaktsü.
Taoba chief secretary Alemtemshi-i NECU tentettsü atema mapa inyakba atema Deo Nukhu-isa pa dang pelaba ashi aser ano Rev. Taku Longkumer-i $10,000 (India nunger sen lakh 6,50000 shi) tenla agütsüba atema pelaba shisem.
Nagaland sorkari akokba tashi NECU nem teyari agütsütsü, ta Parliamentary Secretary-isa metetdaktsü.
Iba sentong nung mendenji NECU Chancellor & Chief Executive Director, Rev. Dr. Anjo Keikung liasü, Angami Baptist Church Council Executive Director, Rev. Dr. Atsi Dolie-i temoatsü meshia sarasadem aser CBCNEI. General Secretary, Rev. Dr. Solomon Rongpi-i tesentepertem pela agizük aser tejak shiyutepba mapang agi.
Sentong nungsa Medziphema Village Council, Chairman Neikhonyu Kuotsu; Nagaland Baptist Church Council General Secretary Rev. Dr. Zelhou Keyho; Manipur Baptist Convention General Secretary Rev. Dr. W. Konghar aser Garo Baptist Convention General Secretary Rev. Dr. Janang Sangma nungertemi o jembi.
Sentong nung Medziphema Village Baptist Church-i ken ka aten, Director of Operation, NECU Huzo Meru-i anküp tepela o jembi aser Nagaland State Chaplain Rev. Kuzierang Thou-i tenüngsang agüja sarasadem.