Medziphema nung Plastic management sentong agi

Dimapur, Rongchii/April 30 (TYO): Plastic amshiba ajanga timtem adokdaktsüba dak sendakba nung tangazükba aser paper agi yangkhu yanglutsü sayuba sentong ka ATSI & Co.in aser Can Youth na senteper Public Hall, Medziphema jila nung kaogo. Iba sentong ya District Administration-i sponsore asü aser IPR, media partner liasü.
Medziphema nungi Nino Krose-i ‘Action for Change’ onük nung ajemdaker jembi. O jembiba mapang lai plastic amshiyim, plastic ajanga pollution adokdaktsüba, waste management aser Three R’s; Reduce, Reuse aser Recycle dak ajemdaker jembi. Laisa, khuret angatetba sensopur ka ama asenoki alima wazüka ayutsü asoshi inyaktsü ta ayongzükba den nüburtem ajungmesotsü atema iba sentong ayongzükba atema Can Youth tenüng asang.
Sentong nung shisalen agütsür Chief Functionary Can Youth, Jenpu Rongmei-i, iba sentong ayongzüka akaba indang rasaa ashiba den plastic pollution ajanga tzü-mopung aser libaliro nung kongshiba indang metetdaktsü. Paisa, plastic pollution ajanga lendong bener arutsüba kodaser tajemba kümdaktsütsü iba indang rasaa ashiba den kaketshir, NGO aser sentong nung dena alir ajak dang jenjang tapet agitsü ajungshi. Maneni pai, riju aser Arogo-i anogo shia libaliro nung plastic mamshitsü atema nüburtem ajungshitsüla ta ashi.
Plastic amshiba ajemdaktsütsü nükjidong nung tetsürtem nem paper yangkhu aser sü yangkhu yanglutsü asoshi tangazükba agüja liasü, ta ketdangser sangdong ka ajanga metetdaktsü.