Medziphema nung school tsüngda quiz / painting tetoktepba agi

Medziphema, June 28 (TYO): June 27, 2019 nü Town Hall, Medziphema nung Medziphema Town Council-i administration den ayongteper environment omen nung ajemdaker Interschool Quiz aser painting tetoktepba sentong ka ayongzüka agiogo, ta ketdangsertem osang ka ajanga metetdaktsü.
Iba sentong nung tetushi tejaoker ADC, Thsuvisie Phoji-i shilem agirtem pelaa agizükba den külemi iba tetoktepba nükjidong metetdaktsü.
Paisa kaketshirtem dang kaketshisatsü dak alia tali angazüktsü aser quiz competition ajanga school tsüngda aser kaketshirtem tsüngda tesendaktep yanglutsü ajungshi.
Asen libajen wazüka ayutsü aser iba osang proktsüji asenok nisung shia teinyaktsü mapa lir, ta shia paisa shisem.
EAC, Sentilong Ozukum-i ketdangsüa round 10 lemsar quiz tetoktepba agia liasü. Iba tetoktepba nung school pongui shilem agia SFS School-i mezüngbuba jenjang nung takok angu, tanabuba aser tasembuba jenjang angurji King David & Government Hr. Sec. School aser CPMS na liasü.
Painting tetoktepba nung mezüngbuba aser tanabuba jenjang nung takok angurji Government Higher Secondary School aser tasembuba jenjang nung takok angurji Modern Christian School liasü.
Takok angurtem nem senpet den certificates agütsü.