Medziphema nung SDEO Office semzük

Medziphema, February 11 (TYO): February 11, 2019 nikongdang Adviser, School Education, Nagaland, K.T. Sukhalu, IAS (Retd.)-i Medziphema sub-division kübok Sub-divisional Education Office semzüktsüogo, ta tanü Press Secretary, NDPP 5 Ghaspani-II A/C, Thejangukho Yalietsu-i sangdong ka ajanga metetdaktsü.
Iba tesem nung mapang talangka nungi SDEO office nüngdaka liasü, ajioda iba sentong nung public lenirtem, tesayurtem aser department nungi ketdangsertem aden.
Iba sentong Host ka ama jembidang Deputy Speaker, NLA, Zhaleo Rio, IAS (Retd.)-i Medziphema division kübok iba office amenoktsüba atema sorkar dang pelaba lemsatep; iba ya ajanga yim 35 shi tajangzük angutsü, ta pai metetdaktsü.
Paisa Medziphema nung iba office amenoktsü atema taoba mapang (2017 küm) School Education Minister, Tokheho Yepthomi lenisüba nung inyakba atema pa dang pelaba metetdaktsü.
Rio-i nübur aser lenirtem dang, kaketshirtem temeden magutsüi malitsü atema kanga kümküma inyaktsü ajungshi.
Tanü iba office amenoktettsüsa KT Sukhalu lenisüba nung inyakba atema pa danga pelar, ta paisa metetdaktsü.
Ano külen Rio-i department ketdangsertem dang, talisa yimtsüngtem nung schools aser tesayurtem rationalization atema inyaktsü metetdaktsü.
Iba dak sendakba nung pai tang Rüzaphema Block-3 nung tesayur mali, kechiyong deputed tesayur ana training atema ogo, ta metetdaktsü.
Kasa sentong nung tetushi tejaoker, Adviser, School Education, Nagaland, K.T. Sukhalu-i, office tasenba ya nüburtem atema lir, anungji office record ajungkettsütsü atema ajaki amalitepa inyaktsüla, ta ayongzük.
Paisa iba office amenoktsüba atema Nagaland sorkar, talisa Zhaleo Rio dang pelaba lemsatep.
Sukhalu-i, nüburtem atema department-i tajungtiba inyaktsü, ajisüaka nüburtemia schools aser office terenlok dak sendakba nung pei teinyaktsü shilem inyaktsüla, ta ashi.
Iba sentong ya R.Amongla Jamir, DEO Dimapur leniba nung agi, SDEO Medziphema Dojü Khate, Recorder liasü. Dosau Kuotsu, President, NDPP 5 Ghaspani-II A/C-ia SDEO office amenoktetba atema ajak dang pelaba lemsatep.
Medziphema Village Baptist Church Pastor, Rev. Megovoto Kuotsu-i Tsüngrem temoatsü meshia sarasadem, Rokosier Savino-i ken ka aten aser Medziphema Town Mechü Krotho President, Akhoto Kuotsu-i tepela anküp o jembia liasü.
Iba sentong agiba mapang nung local MLA, Zhaleo Rio-i battery ajanga amshiba wheelchair ka matamabensar ka, Dhanraj nem tenla agutsü.
Dhanraj-i küm aika public metsümeshidak merükteta liasü, aser iba dak sendakba nung Rio-i, lanuwa nungi tsüngtsüker süaka pei libajen merüktettsü atema inyaker kar rongnung Dhanraj ka lir, ta metetdaktsü.