Medziphema nung teloktemi clean election pusemer

Dimapur, Tsüklai 10 (TYO): Medziphema Town nung aliba tongti teloktemi clean election pusema nungiter aser Tsüklai 27 nü election tiptema agitsü atema lanurtem nem mapa inyaktsü nungloktsüogo.
Tsüklai 10, 2018 nü Medziphema Town Mechü Krotho (MTMK)-i anir tongti teloktem CYO Hall, Medziphema nung senden ka amen aser idangji parnoki bangzüng aika renem.
Medziphema Town indang e-roll nung tenüng züluka malirtem shinga nema polling station nung mapa meinyakdaktsütsü ta tanü parnoki telemtetba ka agi.
Tanü amenba senden nung MTMK, Gaonbura tem, Medziphema Town Women Organisation (MTWO), Medziphema Town Youth Organisation (MTYO), Medziphema Town Students’ Union (MTSU) aser Medziphema Town Trade Union (MTUU) aden aser parnoki Medziphema Town nung alirtem dang election mapang meshimetsü masütsü aser süpokrem magizüktsü atema tayongzükba agütsü.
Medziphema nung alirtemi terenlok atema dang bilemtsüla anungji tarutsü nung terenlok mapa inyaktsü asoshi tetsükdaktsü majurutsü atema nisung shingaia süpokrem meshia magitsü, ta tanü teloktemi bangzünga renem.
Parnokisa Medziphema Town nung alirtem dang pei tasoyim aser jilatemi moi Medziphema nung aliba polling station tem nung pei senti vote enoktsütsü atema mepishia metetdaktsü.