Mega mock drill agiba sülen exercise agiba asadang

Kohima, Rongchii/April 26 (TYO): Tanü state nung Nagaland Emergency Preparedness Exercise (NEPEx) exercice ayongzüka agiba sülen Kezhiekie, Kohima nung aliba State Emergency Operating Centre nung observers, ketdangsertem aser osangbenertemi mock drill agiba asadangba senden ka amen.
Osangbenertem senden nung jembidang NSDMA Advisor, Pukhai Sumi-i Nagaland emergency exercise nung shilem agir sorkar departments, agencies, Assam densema kidanger state tem nungi ketdangsertem dang pelaba lemsatep.
Paisa, “Lendongtsüdong atalokdang nisung taküm kümzüktsü atema asenok koma renema lir, ibaji asadangtsü atema tanü iba exercise ya agiogo,” ta metetdaktsü.
Paisa, sorkar machineries ajak dang iba exercise tajungba akumtsü atema amalitepa inyaktsü mepishiba den külemi tarutsü nung iba execise ya ano tali tajungba nung agitettsü imlar, ta ashi.
Paisa state Machineries dang, ajungben lendongtsüdong balala atalokdang Kohima yimti tesem ajak ayimjema ‘siren’ ola angashitsüsa Science College ama tongtibang tesem nung ‘siren’ amenoktsü aser tiyongtsü tesem ka nung control room amenoktsü benoka liasü.
“Item ama awareness programme ya jila tesemtem nung dang masü saka yimtsüngtem nunga agitsüla, kechiyong nütsüng timbaka yimtsüngtem nung lir, anungji parnok nem iba ya rajema lidaktsütsüji kanga tongtibang,” ta paisa shisem.
Iba sentong lenir Chief Secretary, Temjen Toy-i, state nung lendongtsüdong atalokdang asenok koma renema lir, ibaji tendangtsü atema iba exercise agiogo, aser yaküma kasa sentong agia liasü, ta metetdaktsü.
Mock drill agiba mapang tereprangtetba nung ajemdaker pai, tongtibang tebilemtsü rongnung traffic densema liasü aser iba atemaji inyaktsü nüngdak, ibaji ajangadang lendong atalokba mapang nung traffic timtem ajema akumtsü, ta ashi.
Kohima nung ‘siren’ ka dang aliba dak sendakba nung pai, Kohima jila tesem ajak atema ‘siren’ ka dang lir aser ibaji PHQ nung amenoka lir, ajisüaka iba siren ola jagi yimti nung tesem aika mayimjemtsü, ta ashi.
Iba dak sendakba nung pai NSDMA dang yimti nung tongtibang tesemtem nung ano siren tali amenoktsü tetuyuba agutsü.
Temjen Toy-isa, Assam rifles, CRPF, NDRF, SEOC ama agency balala tsüngda tongtepratep aser execrcise agiba tesemtem tsüngda tongtepratep jenjang reprangshia tajungba akumtsü atema inyaktsüla, ta ashi.
Tarutsü nung terata makai inyaktsü atema SEOC aser exercise agiba tesemtem tsüngda tongtepratep jenjang tajungba akumtsüla, iba denji külemi rongdak mapang nung SEOC ji one point information centre asütsüla, ta paisa shisem.
Paisa osangbenertem danga nüburtem nem awareness agutsüba nung media-i tongti shilem agidaktsüner, ta mepishia metetdaktsü.
“Observer temi shisa balala agutsüba nung ajemdaker tarutsü nungbo table top exercises balala agitsü,” ta pai metetdaktsü.
Iba senden nung agency balala nungi observers aser ketdangsertemi tanü Kohima nung mega drill agiba mapang nung parnoki reprangtetbatem lemsatepa liasü.