Meghalaya: Agatha Sangma kibong kümogo

Tura, Yimpoksüi/November 21 (Agencies): Meghalaya kübok Tura nungi Lok Sabha züngsem Agatha K Sangma Brehostibarnü doctor Patrick Rongma Marak den kibong kümogo.
Teti aser state Chief Minister Conrad Sangma-i pa indang official Twitter account nung tenu kibong akümba indang noksatem kanga nema danga lemsatepogo.
“Kiyimer nem tenüngsang agütsür! Tena liyonga aodang iba telongjem Tsüngremi moajang. Ozü kibong asoshi kanga dang nemadangtsü aser tepela anogo ka lir.”
Agatha Sangma kibong akümba nü Conrad-i tebu asür PA Sangma nem tetushi agüja liasü.
Sangma den külemi Assam finance minister Himanta Biswa Sarma-ia PA Sangma nem tetushi agütsü.
Himanta tenati tebu leper nung pa nem tenüngsang agütsüba mapang tangokba noksatem dena Sangma-i pa indang Twitter account nung lemsatep. “Patrick aser Agatha den kibong maküm tsüngda kübo dang nungi temoatsü meshiogo,” ta pai zülutsü.
“Tsürapur ajaki jangraba ama pai la minoktsür lila aser pa tanü onok den tena aliasübo koda jungla ta bilemer,” ta paisa zülutsü.
Tweet nungsa Meghalaya Chief Minister-i Himanta nem tenüngsang agüja liasü.
Agata shiba Tura nungi Lok Sabha MP lir, la Patrick SR Marak den kiyimba sentong tuluka ayongzüka kibong kümogo, kong Northeast nungi tongtibang nisungtem aika dena liasü.
La Nationalist Congress Party (NCP) candidate ka ama 2009 küm nungi Tura constituency tenüng nung Parliament nung shilem agia arudar.
Maneni la ya UPA yimsüsüba mapang Manmohan Singh Cabinet nung minister of state rongnung tanutsütila liasü.
Kiyimba sentong nung taoba Indian football team captain Bhaichung Bhutia-a tejaoker ka ama arua denogo.