Meghalaya: AMEF züngsem ka surrender asü

Tura, March 24 (Agencies) : East Garo Hills kübok Williamnagar tesem nung joko loksaa taor aliba telungpur telok, Achik Matgrik Elite Force (AMEF) nungi züngsem ka district SP-i aniba telok police tem madang arua surrender süogo.
Iba telungpursang ya arishi küm 22 tain, Raksim Ch Momin (Arikam) ta jangjaogo aser taoba mapang pa Garo National Liberation Army (GNLA) den liasü. Pa iba telok nung 2012 küm nungi batch pungbuba nung dena liasü.
Momin-i Reding T Sangma den lokteper ASAK telok tentettsü asoshi GNLA telok toktsü. Pa Dinangre, Williamnagar nungi lir aser WGH nung superintendent of police, Vivekanand Singh madang par kinungertem aser Arogo züngsemtem dena lia surrender asü.
Police osang ajanga ashiba agi, Momin-i East aser South Garo Hills naprong nung mapa tamajung jenti inyakogo. Pai tesüiba mapang, 2014 nunga Baghmara, South Garo Hills police madang surrender asü aser iba sülen Williamnagar Jail nung puoka ayu.
2015 küm Momin-a Williamnagar jail kakpoka jena aoer rongnung dena liasü aser iba mapang yangji puoka aliba nisung pezü dena jensem. Iba sülen SGH nung parnok nija telok tenteta mao tsüngda Jack Marak-i aniba AMEF telok nung dena liasü.