Meghalaya Article 371 kübok züngoksemtsü asoshi akhangtsü

Shillong, November 1 (Agencies): Meghalaya nung opposition Hill State People’s Party (HSPDP) puri tanü ashiba agi, parnoki Nagaland aser Mizoram nem Article 371 A aser Article 371 G ajanga temeden agüja aliba ama Meghalaya-a Article 371 special provisions kübok züngoksemtsü asoshi akhangtsü. Article 371 ya special provision ka lir, koba ajanga state nem parnok sobaliba, alinük aser yimsüsüba yimya wazüka ayutsü asoshi temeden agütsür, aser iba ya Parliament act kechaia mekongshitettsü.
“Meghalaya Land Transfer Regulation Act, ILP benoktsüba aser Nagaland o Mizoram na nem Articles 371 A aser 371 G temeden agüja aliba ama akhangtsü aser uranium mining anema aser bendanger state-i senoka aitsü tetsübu aliba nokdangtsü asoshi jenjang tapet ka magi tashi passenger trains state-i manioki nokdaktsüba atema HSPDP pur tejangraba lir,” ta Basaiawmoit-i ashi.
HSPDP puri maneni Meghalaya nungi Khasi aser Jaitia state balaka kümtettsüba akhangtsü asoshi telemtetba agi, koba parnok lenir asür Hoping Stone Lyngdoh tejangraba liasü. Party-i ano Khasi nunger oshi Constitution, eighth schedule nung benoktsüba atema raratsü atema lemtet.
Meghalaya lisopur li meyipa agitsüba dak sendakba nung Basaiawmoit-i ashiba agi, parnoki Assam den arrtsü nung mangatettepa aliba bentettsü. Passenger train state-i anioktsüba aser uranium atutsüba nokdangtsüba aser Inner Line Permit (ILP) benoktsüba maparenji 2018 assembly elections atema party pur tongtibangtiba onük asütsü.
Paisa ashiba agi, par teloki Eight Schedule nung Khasi oshi benoka mapa küma inyaka aotsüba pusemer, koba ajanga state nung aliba nüburtem aser talisa lanurtem ajangzüktsü. Basaiawmoit-isa ano state rongsenketsüng tsütsü atsüngzüka aoba tebilemtsü lemsatep, aser ashiba agi, taruba election sülen party kobai sorkar kümtettir, parnoki Meghalaya rongsenketsüng tsütsü maneni taoba mapang ama ajungkettsü asoshi inyaktsüla.
HSPDP tir-i ashiba agi, tang yimsü tesüdak Congress-i aniba MUA II sorkar kübok nisung ishika dang ajangzüker. “Onoki sorkar kümtetra sorkar kübok nüngdak makaba nung sen mindoktsü,” ta paisa ashi.
Taruba election sülen regional alliance puri sorkar kümtetra, MPSC aser DSC ajanga sorkar mapa balala nung lanurtem aniokba tsütsü takok tashi ochishia inyaktsü, ta Basaiawmoit-isa maneni shisem.