Meghalaya aser Bangladesh na arrtsü nung atsü atsütsü

Shillong, March 14 (Agencies): Bangladesh-i nashi aser jang shibelener aotsü asoshi kanga bulua amshiba lenmang tang tashi atsü matsüi lir. Iba tesem ya East Khasi Hills Pynursla nung lir, aser kilometer 30 shi atsü matsü lir, saka iba ya yakta melenshitsü, kechiyong idakji aliba nüburtemi international arrtsü nungji atsü atsütsü asoshi molungogo.
Pynursla ya state yimtiba nungi km 50 shi pilar lir, aser Bangladesh nung Sylhet district den atongtepba lir. Maneni south leni lura ‘Dawki’ lir koba West Jaintai Hills Amlarem constituency den adener.
Pynursla nung tesem kar nashi aser jang shibelener aoba nung nüngtugu lir, aser BSF puri item tesemtem nungi nashi aser jang aika puogo. Iba tesem nung alirtem shibelenba mapa nung densema aliba ajanga atsü atsütsü asoshi mapang talangka parnoki memolungi aru.
“Deputy Commissioner, National Buildings Construction Corporation (NBCC) nungi ketdangsertem aser parnok sobaliba lenirtem-i külemi atsü matsüi aliba tesemtem asadanga, arrtsü nung shibelenba mapatem nokdangtsü asoshi kilometre 30 shi atsü atsütsüla ta lemtetogo,” ta iba tesem nungi MLA aser Border Area Development Minister in-charge, Prestone Tynsong-i ashi.
Atsü atsütsü asoshi memolungba tongtibangba kuliji, yimtaklirtemi parnok li Bangladesh nungertemi rakzüktsü asoshi tsübuba ajanga memolungi liasü, saka Tynsong aser tangartemi atsü matsüba nung timtem tuluba aliba angateta rasaa ashiba sülen parnoki atsü atsütsü asoshi molunga aküm.
“Bangladesh nung nisung tamajungtemi mapang shia India-i arua yimdaklirtemi tsünüa aliba aser parnok indang nashi aser jangtem auyar aoer. Parnok ya 100 shi lir aser parnoki bener otetbatem ajak bener aoer. Iba atsü ya atsüra item mapatem ajak anenadoktsü,” ta Tynsong-i ashi.
Nüburtem dang item tebilemtsütem angateta ashiba sülen parnoki atsü atsütsü asoshi molunga aküm, saka parnoki Home Ministry dang Bangladesh nunger arrtsü anasa iba atsü atsütsü asoshi mepeshi.
Yimya agi atsüji arrtsü nungi yard 150 pilar atsütsüla, saka Pynursla nungbo iba atsü arrtsü anasa atsütsü asoshi Bangladesh nunger ketdangsertem den takok tashi jembiteptsü asoshi molungogo, ta Tynsong-isa ashi.
Dawki, koba nung Integrated Check Post amenloka lir, iba tesem nunga atsü matsüi lir. International arrtsü asazükshitsü asoshi NGO aikati nungshiba ajanga atsü matsüi mapa anüngdaka lir.
Meghalaya aser Bangladesh na arrtsü ya kilometre 4433 lir. Tang tashi nung arrtsü nung kilometre 324 bo atsü atsüogo, saka kilometre 125 tang tashi atsü matsüi alibaji Border Guard Bangladesh (BGB), NGO balala aser Pynursla nung alirtemi memolumgba ajanga lir.