Meghalaya Assembly nung Speaker atema Metbah Lyngdoh shim

Shillong, September 13 (Agencies): 10 buba Meghalaya Assembly nung Speaker inyaktsü atema Metbah Lyngdoh shimogo.
Lyngdoh-i asür Donkupar Roy melenzüktsü.
Speaker indang election nung MLA temi vote belena agütsüteptsü akok ta asüba onük atema Meghalaya Democratic Alliance (MDA) aser opposition Congress tsüngda obang meputepi toktep.
Deputy speaker Timothy D Shira-i ketdangsüa secret ballot ajanga agiba election nung Lyngdoh-i takok angu. Iba election nung Shira-ibo vote magütsü.
Lyngdoh ya Meghalaya Democratic Alliance (MDA) indang candidate liasü aser pai opposition candidate Winnerson D Sangma madak vote 19 agi takok angu.
Taoba Minister Lyngdoh-i vote 59 angu. 2008 nungi pai Mairang Assembly Constituency nung kümsük asemben atongtepa takok angu.
Lyngdoh-i March 6, 2018 nungi Tourism, Excise aser Water resources indang Minister inyaka liasü. Ajisüaka, September 10 nü Speaker indang election nung tokteptsü atema pai Minister menden nungi anen.
September 11 nü pa United Democratic Party (UDP) nunga president inyaktsü shima liasü.
Tanü election agiba sülen Chief minister Conrad K Sangma, opposition lennir Mukul Sangma aser tanga MLA temi Lyngdoh nem tenüngsang agütsü.