Meghalaya Baby League tanü tenzüktsü

Hokulbarnü Meghalaya chief minister Conrad K Sangma den tanurtem külemi tangokba noksa nung angur.

Shillong, Luroi/August 02 (Agencies): Meghalaya Baby League asayamung edition tanabuba ya August 03, 2019 Honibar nungi tenzüktsü ternemba lir. Iba football asayamung ya arishi küm 4 nungi küm 14 tanurtem atema asütsü.
Hokolbarnü State Convention Centre nung sentong ka agiba mapang sports minister Banteidor Lyngdoh, deputy commissioner, East Khasi Hills, M War Nongbri aser Meghalaya Football Association, president Larsing M Sawyan nunger matsüngdang Meghalaya chief minister, Conrad K Sangma-i iba asayamung lapokja liasü.
2buba Meghalaya Baby League asayamung ayongzüktsü asoshi Meghalaya Football Association-i achaayangba atema tenüngsang agüja, Chief Minister Conrad-i, mapang tetemsü nung tanurtem dang football asayatsü tim yimya sayua aser iba yimya amshia intetdaktsütsüji kanga dang tongtibang lir, ta ashi.
“Tanurtem dang football asaya tim yimya sayutsü aser nüngdakbatem nung tetuyuba agüja anitettsü asoshi Meghalaya Baby League ya parnok atema asayamung tetemjem ka asütsü. Ibaji ajanga tarutsü nung item tanur ya football asayar tajung kaka akümtsü,” ta chief minister Sangma-isa ashi.
Baby League ajanga tanurtem dak football asaya nung pei dak aketba sempet tajung sayutetba kisüng nung yariba dang masü saka asaya ka nung takok mesüra tamakok anguyongjia jakla aser yimya tajung aketba asayar ka ama, telongjem nung aser tesüngjem shisatsü nung intettsüsa jenjang tongtibang angazükdaktsütsü maongka angutsü, ta Sangma-i ashi.
Sangma-isa, tsüraburtem dang pei tanurtem nem nüngdakba teyari ajak agütsütsü asoshi mepishia aser saisapong ajanga kaket reju nung tetsükdaktsü adokdaktsütsüsa masü saka pei tanuri jangraba nung yakyaka shilem agidaktsütsüla, ta Sangma-i ashi.
Kasa sentong nung chief minister, Sangma-isa Baby League Trophy saya aser iba mapang Meghalaya Football Association website lapokja liasü.
Iba asayamung nung tanurtem ya küm telemsa nung telok pungu – 4-5 years, 6-7 years, 8-9 years, 10-11 years aser 12-13 years lir.
Football team shia nungi asayar abensa alitsüla.
Taküm küm Baby League asayamung nung shilem agir team rongnung Langsning Greenergy Lions, Shillong Lajong Cayotes, Kick Start FCC Rhinos, Titan Otters, Unified Gorkha Gators aser Mawkhar Roosters SC nunger densema lir.
Honibar anepdang 9:00 ako nungi tenzüka Shillong Lajong Cayotes aser Titan Otters na tsüngda mezüng asayatsü.