Meghalaya BJP MLA-i Modi nem memorandum ka agütsü

Shillong, January 14 (Agencies): BJP-i aniba NDA sorkari Citizenship Bill agizükdaktsütsü atema mapa inyakba mapang ka nung Meghalaya sorkar Deputy Chief Whip Sanbor Shullai-i Prime Minister Narendra Modi nem Bill anema memorandum ka agütsüogo.
Meghalaya nung NPP-i aniba Meghalaya Democratic Alliance (MDA) sorkar nung BJP dena lir. MDA sorkari kodanga iba Bill posema menungittsü ta osang metetdakja lir.
Lok Sabha nung voice vote ajanga Bill agizük saka Rajya Sabha nungbo ano magizük lir.
Committee on Subordinate Legislation, Meghalaya Legislative Assembly aser Meghalaya Tourism Development Corporation Ltd. nung Chairman, MLA Sanbor Shullai-i memorandum agütsüba nung tawa Citizenship (Amendment) Bill 2016 nung melenshitsü benokba magizüker ta shia lir.
Bill nung temelenshi asütsü benokba ajanga Northeastern State tem nung alirtem jashidaktsür, ta paisa ashi.
January 8, 2019 nü North East Students’ Union (NESO)-i Northeast ajungalen ghonda 11 mokdanga liasü. Assam nungbo iba Bill anema lungkak aitba manener.
“Iba Bill ajanga Bangladesh nungi ozüng alema arurtem khuret tamajungba kümdaktsütsü. Nüjiso anguba sülen nungi Meghalaya nung iba khuret ajanga timtema arur. Iba Bill yagi 1951 NRC yanglushiba mapa amajok kümdaktsür. NRC nungsa Assam Accord nung cutoff date March 24, 1971 aliba ama lateta lir” ta Shullai-isa ashi.
Citizenship (Amendment) Bill, 2016 ajanga NRC indang alizüng aser Assam Accord indang tamendakdak raksatsütsü, ta South Shillong MLA-isa memorandum nung shia lir.
Bill ajanga Meghalaya nung lisopurtem tashi mait kümdaktsütsü ta bilemer. Iba bill ajanga Meghalaya nung lisopurtemi timtem ajurutsü aser ozüng alema arurtemi Meghalaya nung arua alitsü aser senso akümtsü, ta Shullai-isa metetdaktsü.
Tesüiba küm aika Bangladeshi senso aika ozüng alema Meghalaya telungi aita lir. Bill nung ammeter parnok talila arua jenoktsü aser state indang litsü nung kongshiba sülen lisopurtem telok tilaba kümdaktsütsü, ta paisa shisem.
Meghalaya state aser Northeast ajungalen international boundary atsü mesüra telatet shitak mali. Meghalaya kübok tesem aika nung Bangladeshi nungertemi arrtsü adena melamela senzüteter, ta Shullai-isa metetdaktsü.
Asenoki nisungtem tamangba yimsü nung ajemdaker jangjatsübaji kanga tasak aser iba jagi ozüng alema arurtemi tamangba yimsü nung ajemdaker senso akümtsü. Iba ya Constitution nung Arrla 14 alema inyakba mapa ka asütsü, ta paisa shisem.
“Iba Bill ajanga ozü state Meghalaya aser Northeast ajungalen nübortem jashidaktsür aser iba jagi ni party nung züngsemba meyipa reprangshitsü bilemer. Northeast State tem nung alirtemi ola adokba mangashii Lok Sabha nung Bill agizük aser iba ajanga BJP-i northeast state nung alirtem atema mebilemtsür ta sayur” ta Shullai-isa memorandum nung shia lir.