Meghalaya: Bus lendong nung nisung 30 asü

Shillong, June 15 (Agencies): Meghalaya nung bus ka longreni feet 500 lua tsükokba lendong nung tajemba agi nisung 30 süogo aser nisung 9 kanga mejungi yirua lir, ta Bodhbarnü police-i metetdaktsü.
Mongolbar aonung tesü Meghalaya yimtiba, Shillong nungi kilometer 150 shi pilar aliba East Jaintia Hills district kübok Sonapur nung iba lendong ataloka liasü.
Ano kümzükba maparen inyaker police asema yirua alirtem kümzüktsü merangdang longbanglen nungi  long aluba ajanga yiruogo.
East Jaintia Hills district police tongti, Spill Thamar-i, “Onoki yirua alir nisung teku  kümzükogo aser longren nungi tasümang tenet anitetogo,” ta metetdaktsü.
“Tsüngsang majungba den külemi tesem kanga majungba ajanga kümzükba maparen anena lir. Onoki maneni asüngnep (Brihostibar) kümzükba maparen tenzüktsü,” ta paisa ashi.
Nija meyong bus ji Silchar nungi Meghalaya ajanga Guwahati-i aoba mapang iba lendong atalok.
Thamar-i ashiba agi, kenaga mejungi yirua alirtemji Shillong nung aliba North East Indira Gandhi Regional Institute of Medical Sciences (NEIGRIMS) aser West Jaintia Hills district nung aliba Jowai Civil hospital-i anir ogo.
“Tang tashi nungbo iba lendong atalokba kuli tejangja onoki memetet,” ta paisa shisem.
Shillong Times osang ajanga ashiba agi, aonung senzüba bus ka longreni lua tsükokba ya tang mezüng lir.