Meghalaya By-election atema administration-i tensa asadang

Shillong, Luroi /August 19 (Agencies): South Tura constituency nung lendong adoktsüsa aliba polling station 8 lir, aser iba dak sendakba nung West Garo Hills district administration-i bye election junga agitettsü atema tensa asadangogo.
Iba bye election ya Luroi/August 23 nü agitsü.
South Tura constituency bye election ya kanga tongtibang election ka lir, kechiyong Meghalaya Chief Minister, Conrad Kongkal Sangma-i iba election nung tokteper, kechiyong pa maneni Chief Minister inyaktsü atema tenth Meghalaya Legislative Assembly nung züngsem ka akumtsü nüngdaker.
South Tura constituency by election atema Central Armed Police Force (CAPF) company pezü yoktsü. South Tura den külemi Ranikor constituency nunga by-election külemi agitsü aser parnok nema Central Armed Police Force (CAPF) company pezü lemzüktsüogo.
Tura nung osangbener den phone ajanga jembidang West Garo Hills Deputy Commissioner, Ram Singh-i, “South Tura nung by election agitsü atema onoki state police aser CAPF den senteper security tensa asadangogo,” ta metetdaktsü.
Multi Facility Centre, District Rural Development Agency, Tura nung ayongba review senden nung Inspector-General, CRPF densema CAPF ketdangsertem, DIG (law and order) Western Range aser district ketdangsertem aden.
“Tensa junga lir aser by eletion atema CAPF company pezüji teperi. Onoki senden nung security atema jembi, iba denji külemi transportation aser tanga nüngdaktem atema-a jembiogo,” ta Singh-i metetdaktsü.
Election nüboyim sentong Luroi/August 21 nü nikongdang 4:00 ako nung tembangtsü aser Luroi 23 anepdang 7:00 ako nungi nikongdang 5:00 ako tashi vote agutsütsü.
South Tura nung polling station 36 nungi polling station 18 bo lendong adoktsüsa lir.
Iba menden atema Chief Minister dak alia tanga candidates rongnung opposition Congress Party nungi candidate, Charlotte W Momin, Independent candidates ana- taoba mapang South Tura nung MLA, John Leslee K Sangma aser Chris Kabul na densema lir.
Conrad ya Tura nungi Lok Sabha MP lir aser NPP Tir lir.
South Tura nung voters 30440 lir aser parnok rongnung tebur 14,966 aser tetsür 15474 lir.
Iba dak alia service voters 37 lir aser persons with disabilities (PwDs) voters 35 lir.
Voters timba aliba polling station ji Matchakolgre Community Hall lir (1337 voters) aser voters ishiba aliba polling station ji Leper Colony (151 voters).
Tetsür temeja polling station ka Upper Babupara (L G B Higher Secondary School) nung amenokogo aser model polling stations anaji – Tura Govt. College (Room No. 1 Separate building) aser Tura Govt. College (Room No. 2 Separate building) na lir. Ano PwD model polling station ji Leper Colony LP School lir.