Meghalaya Cabinet alidak ILP pusema zülur yutsü; Home Minister James K Sangma agientsü rongshir

Shillong adener Jowai nung Meghalaya ‘Cabinet On The Move’ senden amendang agiba noksa angur. (Jowai, February 4)

Jowai, February 4 (Agencies): Mongulbarnü Jowai nung Meghalaya Cabinet senden amen aser iba tesem nung nisungtemi ILP pusema zülua yutsü.
Soil and Water Conservation, Territorial Division indang office atsü nung ‘No ILP, no Cabinet’ ta zülur toktsü.
Meghalaya Cabinet sendenji anüngdang 12:20 ako meta tenzük.
Meghalaya nung Inner Line Permit (ILP) benoktsü atema takhangba agütsüba telok nung züngsem kari iba ya zülu ta osang ajanga ashi.
Meghalaya Cabinet senden temendak nung Jaiñtia Students’ Movement nungi züngsem kar office jagi arur Meghalaya chief minister Conrad K Sangma nem memorandum ka agütsü.
Kaketshirtemi East Jaiñtia Hills district nung government college ka lapoktsü atema takhangba agütsü. Iba onük ya 2015 nungi anendaka yua lir.
MDA sorkari Shillong adener Meghalaya Cabinet senden amenbaji tang agi tanabenbuba agiogo.
Tanü senden nung Minister aser tongti ketdangsertemi Home Minister James K Sangma mapa nungi agientsü atema onük benok ta osang ajanga ashi.
UDP aser PDF Minister temi James anema ola adoker aser pa ket nungi Home Ministry agientsü akhanger.
James ya taoba Lok Sabha Speaker Purno Agitok Sangma’er jabaso tambusang lir aser paisa Power aser District Council Affairs bena lir.
Abhijit Basumatary ta ser nisung kati Khliehriat nung SP anema FIR ka benokba nung ajemdaker Meghalaya Lokayukta chairperson P K Musahary-i January 10, 2020 nü chief secretary M S Rao dang nakmati ken o atema CBI nem bushisüngdang südaktsütsü tetuyuba agütsü.
CBI-i Meghalaya Lokayukta nem bushisüngdang osang ano magütsü saka osang ajanga ashiba agi ozüng alema nakmati shibelenba nung James K Sangma dena aliba kulitem nguteta lir.
CBI-i iba ken o atema bushisüngdang tenzükogo aser iba dak sendakba nung parnoki Abdul Ahad Choudhury dang asüngdangya süogo. Pa ya Assam kübok Karimganj district nung alir.
Abdul ya ozüng alema nakmati shibelenba atema July 9, 2018 nü Cachar district kübok Katigorah nung apu.
Iba sülen CBI-i par kidang diary ka angu aser iba nung Meghalaya nung ketdangsertem, MLA tem aser minister kar nakmati maparen nung shilem agiba kulitem lir.
Abdul-i CBI ketdangsertem dang Meghalaya nung ozüng alema nakmati maparen inyaktsü atema James K Sangma nem ‘protection money’ agütsüba shiogo.
Hombarnü James ya New Delhi nungi meyipa arudang Guwahati nung Abdul Ahad Choudhury den ajuruteptsü jembitepa liasü, ta osang ajanga ashi. Ajisüaka, Abdul-i James den ajuruteptsü memulung.
Ozüng alema nakmati shibelenba maparen nungsa Suraj Joshi ta ser nisung ka CBI-i putetogo.
Joshi ya Mawprem nung alir aser pa ya James den tesentaktep tajung aliba nisung ka lir.
James-isa Meghalaya nung journalist tem den obang meputep adoka raratep.
January 5 nü James-i journalist telok ka den toktep aser idangji pai The Shillong Times nung news editor E M Jose dak tenük yoka jembi.
Iba tatalokba atema Meghalaya Editors’ and Publishers’ Association (MEPA)-i James dang yimjak nung tatok meshiang ta takhangba agütsü saka pai ibaji meinyak.