Meghalaya, CCA ketdangsertemi Nagaland nung aliba CCA tesem sema senzü

Mokokchung, August 31 (TYO): Meghalaya South Garo Hills kübok Community Conserved Areas (CCA) ter (10) nungi ketdangser kar arua Nagaland nung aliba CCA tesem kar sema jajadar; iba ‘Exposure Trip’ sentong ya Foundation for Ecological Security (FES)-i yaria ayongzükba lir.
August 28 nungi tenzüka parnoki Nanga (Dikhu) Greener Zone, Yehemi Lithsami Kiyetha (YLK) Community Conserved Areas (CCA) tesemtem sema jajaogo. Brihostibarnü item telok yagi Tzüla Green Zone Project Management Committee (TGZPMC) pur ajurutepa sensaksem senden ka yangi Circuit House Mokokchung nung menogo. Iba senden nung tongtibangsa Tzüla (Dikhu) Green Zone mapatong ya koma achaayanga bener aor ta asüba onük dak sendakba nung shisalemsatepa liasü.
Iba sensaksem sentongji temer külen parnoki Tzüla (Dikhu) Green Zone tesem semdanga tang teinyakdak mapatem penzüa jajaa liasü. Tzüla Green Zone ya Longsa o Ungma yimnasangeri 2010 küm April 10 nü alima tzü mopung, arem min aser shirurutem wazüka ayutsü nükjidong yur tenzükba lir. Mapang shia iba mapa reprangi ana aser talang nungi limapenzürtem aser nüngdak balala asoshi nija aser telok balala aruli oli asür.