Meghalaya CM-i 1buba Shillong medical college lapoktsüba long azüngtsü

Shillong, December 7 (Agencies): Mapang talangka ataba sülen state nung mezüngbuba medical college Shillong Medical College atema Chief Minister, Dr Mukul M Sangma-i Bodhbarnü iba college yanglu tenzüktsüba atema long azüngtsüogo.
Iba medical college ya PPP mode nung Reid Chest Hospital, Mawbah, Shillong nung amendaktsü. Dr Sangma-i ashiba agi, infrastructures amenoktsüba aser PPP mode nung project inyakyonga aotsüba ya kanga dang mapa tasak ka lir, kechiyong PPP inyakyim ya aika atema tasen lir.
Ajisüaka pai ashiba agi, Meghalaya state sorkari state nung PPP mode nung terenlok sentong tem aika takok ngua inyaka aruogo aser tang Shillong aser Tura nung medical college amenokba ajanga medical professionals tem peria maliba tebilemtsü agintsütsü, aser state nung aliba nüburtem nem Health facilities tajungba agütsütsü.
Chief Minister-isa ashiba agi, medical college ya medical professionals akümtsüba atema tejangrar kaketshirtem asoshi dang masü saka health tsütsü tebilemtsü adokba nung state sorkar aser policy yanglurtem nem teyari agütsütsü. Maneni medical college ya tertiary referral centers tem lir.
“Iba amala medical colleges asen state nung lapokba ajanga nüburtem Delhi, Vellore mesera Chennai nungeri temang anepalutsü atema aotsü aliba tebilemtsü agintsütsü. Iba ya medical kaketshirtem atema dang masü saka nüburtem atema temang anepalutsüba asoshi nüngdaka aliba ka lir,” ta CM-i ashi.
Dr Sangma-isa ashiba agi, treatment agütsütsüba atema strategy tasen angazüktsüla aser doctor o nurse temi shirangertem anepalutsüba atema shisatsü aser skill shidak angazüka bener alitsü nüngdaker.
Iba sentong nung o jembirtem rongnung Minister, Urban Affairs, R V Lyngdoh, Minister, PWD (B), , KPC Medical College, Kolkata Secretary Dr M Ampareen Lyngdoh, Krishna Das, Finance Secretary, KPC Medical College, Kolkata, Uttam Das aser Dr D Lyngdoh, Director, Health Services (MI) shibai pelaa agizükba o jembi. Maneni iba sentong nung Additional Chief Secretary, Health & Family Welfare, P W Ingty-a dena liasü.