Meghalaya CM-i 2018 sülen tashitaitba sorkar ka kümtettsü nangzük

Shillong, April 12 (Agencies): 2018 Assembly election tembangba sülen Congress teloki yimsüsüba menden kümtettsü aser iba sülenang Meghalaya nung sorkar tali takangba akümtsü, ta Meghalaya CM Mukul Sangma-i ashi.
“Onok kanga dang tadentep jenjang ka nung lir aser onok nükjidongji linük tejangrabatem kümzüka ayutsübaji lir. BJP den Congress-i kisüngi dang tokteptettsü. Congress-i BJP den metoktepra tajemtsüka tanga party-ibo metokteptettsü,” ta Sangma-i ashi. “Kechiba BJP-i Northeast dak tenük yoker? Iba ya tashi asoshi masü saka Northeast nung BJP agizükteter ta tebilemba ka nübur molungjang nung inoktsütsü asoshi lir,” ta pai shisem.
Sangma-i maneni ashiba agi, Meghalaya nung aliba nüburtemji Nagaland nung aliba nüburtem ama masü. Parnoki terenlok aginür.
Sangma-i ashiba agi, BJP tashi taitba kümra iba ajanga Congress tashi meite kümdaktsütsü aser tanü linük-i kechi jenjang tongteta ali, iba ya Congress ajanga lir. Tangbo asenok Pakistan nunger yimya nung odar.
“Lendong aketba sentongtem bener BJP tejakleni aotsü nokdangtsüji kanga tongtibang lir. Election tamakok anguba mapang AICC Vice President Rahul Gandhi kijai nokdakogo aser tanungba Congress lenirtem ajak samadok. UPA küm 10 yimsü asüba mapang tashi maitba ajanga 2014 election nung tamakok angu. Iba mapang sorkar menden nung ochi mashi alibaji Centre nung teloktep sorkar asüba ajanga lir,” ta Sangma-i ashi.
Punjab nung party-i akokba aser Goa o Manipur na nung telok ajak rongnung timba menden akokba ajanga Congress nem teimla agütsüba Sangma-i lemsatep. “Linük nung nüburtemi Congress sendokba asüngsashitsü atema lisopur telok ka dentettsü nüngdaker,” ta Sangma-i maneni shisem.