Meghalaya CM-i PM Modi dang state majung indang jembitsü asoshi ministertem ojang yoktsü ashi

Shillong, November 2 (Agencies): Meghalaya nung Election madong tsüngda congress aser BJP na toktepba mapang ka nung Chief Minister Dr Mukul Sangma-i, Union Ministers tem state-i osang magütsüi aruba, aser linük indang federal structure raksatsüba atema Centre sorkar aitsüogo.
Ato Kilonser Modi-i tasa asaba mepelai Dr Sangma-i ashiba agi, “Pai party lenir tanga yokang. Kechiba union ministers tem yoker, parnok aotsü aser state anem dang jembitsü. Alima nung democracy linük tulutiba nung centre-state tesendaktep yamai asütsülaa na?”
“Kodaser union ministers kati kuli tejangja ka makai state sorkar aitsütettsü? Parnok arua shidakbaji kechi aji bushitetang?” ta Dr Sangma-i ashi.
Anogo ishika tejakdang Union Tourism Minister KJ Alphons-i, Meghalaya CM-i nüburtem sen ajak auyar, ta aitsüba Sangma-i magizükteti, iba amala taitsüba yabo ozüng ajanga bushisüngdangtsü nüngdaker, ta ashi.
“Union minister shirnoksa state-i arudir parnoki chief minister dangi mezüngbuba shidi ka yoktsüla, aser parnok kechi sentong nung adener aji ashitsüla, iba sülenbo pai par party ajurunera ajuruang. Iba amaji Centre aser state na tesendaktep yanglur, saka tang inyakyim iba amaji masü. Item minister tem yagi state sorkar anema dang jembir,” ta paisa ashi.
Minister kati olen ka jembizüka meyok tsüngda kuli tejangja mezüng bushitettsübaji temzüng nung keta lir. BJP lenir Alphons-i, Sohra nung lokti senden ka nung CM-i nüburtem sen auyar ta ashiba kuliji kong ali, ta Sangma-i asüngdang.
“Kodaser minister kati nisung mashi ka ama yamaji jembir? Iba ya minister ka memesük, aser Ato Kilonser-i iba ya reprangteta anendaktsütsüla,” ta Chief Minister-i ashi.