Meghalaya gari lendong nung Tenla kidangi aoer nisung 17 tsükset, 60 yiru

Shillong (Meghalaya), February 27, 2017: Deobar anepdang West Khasi Hills district kübok Nongspung yim nung truck tsükoker aliba noksa nung angur. Iba lendong nung nisung 17 asü aser nisung 60 dak tema yiruogo.

Shillong (Meghalaya), February 26 (Agencies): Tanü temeshi amongnü Meghalaya, West Khasi Hills district nung aliba National Highway nung truck kati ‘railing’ nung atsükba lendong nung tekülem kidangi aoer nisung 17 tashi asü aser nisung 62 yiruogo.
Asürtem rongnungji tetsür teku den arishi küm 13 aiür chanu ka densema liasü.
Tanep 8:30 ako meta West Khasi Hills district kübok Nongspung yim nung iba lendong atalok, ta police ketdangser kati metetdaktsü.
“Truck ji kanga kera anibayong gari anisangi mazüokteti lenmang tezülen railing nung atsük,” ta West Khasi Hills Superintendent of Police, Sylvester Nongtnger-i metetdaktsü.
Lendong atalokba tesem nungjisa nisung 12 atanga asü, aser nisung pongu Nongstoin Civil Hospital nung asü, ta SP-i ashi.
Kanga mejungi yirua alirtemji Shillong Civil Hospital aser NEIGRHIMS densema mozüki balalai anir oa yaridar.
Yim asem- Nginiong, Mawbyrkong aser Nongbudum nungi yimtaklir parnok nisung 70 dak tema Synod Arogo tekülem nung adentsü atema Tenla kidangi truck nung aodang iba lendongji atalok.
Nongtnger-isa ashiba agi, truck anisang aser pa den yaritepsang naji anameta aliba hospital-i anir oa yaridar.
Paisa, “Iba gariji kanga kera aniba yong tsükok ta tenük kuli alirtemi shiogo. Ajisüaka lendong atalokba kuliji onoki bushisüngdangdar,” ta metetdaktsü.
“Onoki gari anisang anema Indian Penal Code aser Motor Vehicles Act kübok section balala nung ken o beokogo,” ta police ketdangserisa shisem.