Meghalaya Governor V Shanmuganathan anema maneni noktak

Shillong, January 27 (Agencies): Meghalaya Raj Bhawan nung mapa inyaker parnok 100 shi-i PM Narendra Modi, aser tir Pranab Mukherjee dangi Meghalaya Governer V Shanmuganathan mapa nungi anendaktsütsü asoshi shidi züluba, sülen Governor-i pa mapa nungi anentsü asoshi temelaba meshia shidi züluogo, saka pa anema züluba ken o ji shitak masü, ta pai ashi.
Shidi koba Governor ki nung mapa inyakertemi zülu iba shidi Social media balala nung ayimsünga ao. Iba shidi nung pai pa mapa inyakertem mezüngmeshiba, mekümdangi kongshiba, maksütsüba aser reshikangshiba atema pa mapa nungi agientsü takhangba agütsü.
“Meghalaya nung Governor agiena Raj Bhavan tanaben akhümketa kümdaktsütsü asoshi Prime Minister-i yariang,” ta shidi nungsa zülua liasü.
Küm 67 tain Shanmuhanathan-i par kidang mapa inyakertem tetsür dang ayuba ken o nunga pa aitsü. Osang ajanga ashiba agi PR mapa asoshi aoba tetsür ka dak tim mesüi kongshiba atema pa maneni aitsüogo. Tetsürlai ashiba agi Governor-i la dak azüita, tepang mesep aser teti asoshi mesüra khen atema Raj Bhavan nung lai koba mapa aginür aji agütsütsü nangzük.
RSS züngsem Shanmuganathan 2015 nung BJP-i Meghalaya nung Governor asütsü asoshi shimtet.
BJP-i ashiba agi, kuli tejangja melii o mashi mejembitsüla, kechiyong iba ken o nung tetsür shingaia ashishia mali.
Republic Day anogo nung longkak aiter nisung aika yimdong nung Governor mapa nungi anendaktsütsü asoshi takhangba agüja nokdak. Tetsür 400 dak temai iba ken o bushitsüngdangtsü atema takhangba shidi zülu.