Meghalaya-i 12 buba SAG den sentakba maparen kara inyaktsü ajungshir: Sonowal

Guwahati, October 28 (Agencies): Sangküm, 2016 February ita asayatsü ayongba 12 buba South Asian Games (SAG) tetsükdakba kechi meli asayatsü nükjidong nung iba asayamong den sentakba terenemshibaren ajunga taküm December ita 15 nü tashi nung tembangtsü tajungshiba olen ka India Sports Minister, Sarbananda Sonowal-i Megahalaya sorkar dang tanü Bodbar nü metetdaktsüogo.
12 buba SAG asayamong Shillong aser Assam kübok Guwahati yimti na nung asayatsü renema lir.
12 buba SAG indang Games Office lapoktsütsü asoshi Shillong semdang, minister-sangi iba tajungshiba olenji metetdaktsü.
“12 buba SAG asayamong takokba nung asayatsü asoshi iba asayamong asayadak 5 prongla densema nungdakba terenemshibaren ajunga tekaraba mapang nung renemtsü asoshi state sorkar dang metetdaktsüogo,” ta Sonowal-i metetdaktsü.
“Iba asayamong atema renemshitsü nung amshitsü asoshi Centre sorkari sen crore 20 lemzüktsüba nungi sen lakh 92 tashi Meghalaya sorkar nem amoktsüogo. Centre sorkarisa iba asayamong takok ngua asayatsü asoshi sen crore 60 renemja lir,” ta Sonowal-i Megahalaya Sports Minister, Zenith M Sangma; Chief Secretary, P B O Warjri aser tongti saisapong ketdangsertem den senden ka amenba sülen metetdaktsü.
Ano külen, Rio 2016 Olympics asoshi terenemshibaren takok ngua agitsü nükjidong nung India nunger Olympic asayartem nem senotsü teyari timba agütsütsü renemba osang ka Sonowal-isa tanü metetdaktsüogo.
Archery nung asayar 4, Athletics nung asayar 14, Hockey nung tetsür 16 aser tebur 16, Shooting nung asayar 8 aser Wrestling nung asayar 1 densema tanü tashi nung India nunger asayar 57-i Rio Olympics nung shilem agitsü jenjang ajangzüka lir.

You must be logged in to post a comment Login