Meghalaya-i South Asian Games mayongtsü amokmerener

Shillong, January 6 (Agencies) : Assam aser Meghalaya nati South Asian Games külemi yaritepa ayongzüka amungtsü sentong lir saka iba asayamung nung badminton asaya Shillong nungi Guwahati-i belenba agi Meghalaya-i iba asayamung ayongzüktsü nangzükba meyipa agitsü amai kümogo.
Meghalaya Olympic Association working president John F Kharshiing-i IOA President N Ramachandran aser SAI DGInjeti Srinivas na dangi züluba shidi ka nung state sorkari 12 buba South Asian Games ayongzüka amungtsü telemtetba meyipa agitsü atema mapa inyaker ta shia lir.
“Badminton asaya Shillong nungi Guwahati-i belenba nung ajemdaker Meghalaya sorkari 12 buba SAG 2016 mayongzüktsü atema mapa inyakba osang onok dang sangoktsü” ta Kharshiing-i shidi nung shia lir.
February 5-16 tashi 12 buba SAG 2016 asayamung asoshi Meghalaya nung Badminton, Table Tennis, Archery, Boxing, Judo, Taekwondo, Wushu, Women’s Football) aser Assam nem asaya 15 lemzükja liasü.
“Taruba anogotem nung Meghalaya sorkar ketdangsertem senden ka alitsü aser iba nung parnoki telemtetba ka agitsü. Iba onük atema nenoki tekaratiba nung langka ka inyakdaktsünür” ta Meghalaya Olympic Association working president Kharshiing-isa Ramachandran aser Srinivas dang mepishia metetdaktsü.
Meghalaya yimtiba nung badminton asayatsü atema stadium tajung maliba ajanga iba asaya Guwahati nung alitsü atema belentsü telemtetba agia liasü.
Shillong nung aliba North East Hill University nung SAI Sports Centre ji multipurpose indoor stadium ka lir saka Badminton Association of India-i iba stadium dak temulung masür.
State badminton telok nung President Werlock Kharshiing-i iba onük atema BJP lennir kar aitsüogo.
BJP lennir aser taoba minister Himanta Biswa Sarma-i Assam State Badminton Association Chairman mapa inyaker aser pai Shillong nungi Guwahati belentsü atema mapa inyak, ta Kharshiing-i aitsü.