Meghalaya kübok Indo-Bangladesh arrtsü nung BSF-i nashi aika apu

Shillong, Luroi (August) 17 (Agencies): BSF Meghalaya Frontier nung sepaitemi Indo-Bangladesh arrtsü anasa sen lakh 13 alang nashi puogo.
BSF-i Shillong nung sangdong ka metetdaktsüba nung, Independence Day nü East Khasi Hills district kübok Tuka nung BSF sepaitemi arrtsü anasa senzüsenbongba lazük ta ashi.
BSF operation party-i iba tesem tonga ao saka idangji nisungtem jena ao saka sen lakh 5.8 shi alang nashi 28 apu, ta parnokisa metetdaktsü.
“Nashiji India nungi Bangladesh-i ozüng alema bener aoerba liasü. Atsü maliba tesem ajanga shiruru shibelenertemi nashi bener aotsü merang saka BSF jawan tem kanga kümküma mitba ajanga iba tasaji takok mongudaktsü” ta BSF sangdong nungsa ashi.
East Khasi Hills district kübok Muktapur, West Jaintia Hills, Lyngkhat aser Patharghat tesemtem nunga BSF sepaitemi sen lakh 7.2 shi alangba nashi 41 apu.
Independence Day nung nashitemji India nungi Bangladesh-i bener aodang api.
Meghalaya den Indo-Bangladesh arrtsü kilometer 444 nung ayong tilatem, arem-min aser tenemkong aika lir aser iba ajanga shiruru shibelenertemi aser ozüng alema mapa inyakertem senzüteter” ta BSF-isa metetdaktsü.
`Eid-ul-Azha’ amungtsü aliba atema Bangladesh nung nashi kanga nüngdaker aser iba nung tajangzük tulu aliba ajanga shiruru shibelenertemi arrtsü adena belentsü meranger.
Tsüngsang majungba nung tajangzük aika shiruru shibelentsü meranger. Taoba ita ishika Meghalaya nung iba mapa kanga bulua inyaker aser iba inyakyim azüoktsü atema BSF sepaitemi kanga meranga mapa inyaker, ta sangdong nungsa shia lir.
Taoba anogo pezü tsüngda BSF Meghalaya Frontier-i nashi 344 puogo. Ano, Tuka, Hat Thymmai, Lyngkhat, Umsyiem, Ryngku, Shella, Patharghat aser Muktapur tesemtem ajanga sen lakh 73 shi alang Bangladesh-i ozüngi noktangba oset belentsü merangba apu.
“BSF-i mapang shi nashitem apuba ajanga Meghalaya nung aliba international border ajanga shiruru kanga belenba mapa inyakba sayur” ta BSF-isa metetdaktsü.