Meghalaya Minister-i vote agütsürtem noktangba video ka prokshi

Shillong, March 1 (Agencies): February 27 nü Meghalaya nung Transport Minister, Sniawbhalang Dhar-i West Jaintia Hills nung vote agütsürtem noktangba indang video ka kanga prokshir aser nisungtemi pa merenshitsü atema takhangba agütsür.
Video nungji Dhar-i par candidate nem vote magütsürtem noktanger aser iba atema model code of conduct nung ajemdaker pa merenshitsü akhanger.
Ummulong polling station nung Dhar-i “shirnoki kü candidate anema vote agütsütsü noktaka lir, iba polling station toktsür oang” ta ashir.
Ajisüaka, Minister Sniawbhalang Dhar-i pa dak tai tongloktsübatem magizüker.
“Vote agütsüi arurtemi local committee ajanga inyakyim latetba sülen manidak aser tarensena noktaktsü memulung” ta pai ashi.
“Nisungtemi tashi mangaba ajanga ni parnok azüoktsüsa aküm. Ni tarensena noktaka alirtem dang vote agütsüdaktsütsü ta ayimten. Tarensena noktaktsü memulungertem polling station nungi meindoktsüla ta ni ashi” ta pai osangbener dang ashi.
Video nung ni NPP, UDP mesüra Congress candidate atema vote agüjang ta mashi, ta Dhar-isa shisem.
“Iba video tai meyipzük aser social media nung prokshir. Iba atema ni FIR ka benokogo aser shibai video ji tangokar metettsü” ta Transport Minister-isa metetdaktsü.
Iba dak sendakba nung West Jaintia Hills indang deputy commissioner tsüngdang ken o ka benokogo aser bushisüngdang ka asütsü tuyuogo ta osang angazüker.
Tanü Commissioner and Secretary in charge of District Council Affairs department, Tining Dkhar-i ashiba agi election agidang poll code alema inyakba kecha maliasü.
ADC elections agitsü anogo ka lia NPP züngsem kari Mawkhar-Pynthorumkhrah nung vote agütsür nem sen lema agütsü ta asüba video ka prokshi.
Iba constituency nungi NPP candidate ji PN Syiem lir aser pa ya taoba KHADC nung CEM lir. Pai ashiba agi polling agents nem polling anogo amshitsü atema senji agütsü.