Meghalaya MLA ana BJP nung denogo

Shillong, August 28 (Agencies): Meghalaya nung Jaintia Hills nungi independent MLA ana Hombarnü Bharatiya Janata Party (BJP) nung denogo aser iba ajanga 2018 küm election madong tsüngda BJP pur tashi tali akangshiogo.
Meghalaya BJP unit sangdong ka ajanga ashiba agi, tang Jaintia Hills MLA teinyakdak ana Hombarnü New Delhi nung party den denogo. Tena ya Khliehriat nungi Independent MLA Justine Dkhar aser Mowkaiaw constituency nungi independent MLA Robinus Syngkon lir.
Tena party nung adenba sentong ya National Headquarter, New Delhi nung aka aser iba sentong nung BJP National tir Amit Shahji, National General Secretary Ram Madhavji, Assam Finance Minister Himanta Biswa Sarmaji, State Prabhari Nalin Kohli aser State tir Shibun Lyngdoh aser State nungi lenirtem, Thomas Nongtdu aser Rollingson Dkhar nunger dena liasü.
“Lenir ana party nung adenba ajanga 2018 küm election nung Jaintia Hills nung dang masü saka state ajak nung kanga teyari agütsütsü,” ta BJP State unit tatongtir JA Lyngdoh-i ashi.
Maneni Lyngdoh-i ashiba agi, tanga state nung taoba general assembly election tem nung nüburtemi BJP sapuba nguogo aser kasaji Meghlaya nunga ataloktsü.
“Nüburtemi taruba election nung BJP ji dang parnok asoshi tim asütsü ta molungteteogo aser aji ataloktsü kechiyong asen Ato Kilonser indang slogan tongtibangtibaji ‘Sabka Saath Sabka Vikas’ lir,” ta Lyngdoh-isa ashi.
Kasa mapang nung iba senden nung Amlarem MLA Stephan Mukhim-i ‘coordination of Coal Dealer’s and Miner’s Association’ tenüng nung tezüluba nung takhangba ka Sixth Scheduled Presidential Notice 12 AB dak sendakba nung National BJP tir nem agütsüogo.