Meghalaya MLA-i mangatettep aliba ali map nung inoksemtsü asoshi akhang

Shillong, March 22 (Agencies): HSPDP MLA, K.P Pangniang-i Assam aser Meghalaya na tsüngda mangatettep adoka aliba ali tesem 12 Meghalaya map nung inoktsü asoshi benok. Assam aser Meghalaya na tsüngda item tesemtem dak sendakba nung mangatettep adoka aliba ken o mapang talangka nungi bentettsü asoshi meranga arudar.
Assembly nung arrtsü nung mangatettep aliba ken o benoka lemtepdang, Rambrai MLA-i sorkar dang, 2009 küm adokba map, koba nung item tesemtem inoka mali, iba melena 1976 Meghalaya map koba nung mangatettep aliba tesem 12 prongla inoka lir, iba map amshitsü asoshi shidang.
“Mangatettep adoka aliba tesemtem nung arrtsü yanglua mali. Ibayongji map nung item tesemtem inoka mali,” ta Revenue & Disaster Management repa abensang, Deputy Chief Minister, R.C Laloo-i langzü.
Survey of India, Department of Science & Technology nungi agütsüba Meghalaya map nung district 7 dang sayua lir, saka iba map nung mangatettep adoka aliba tesem kata inoksema mali. “Survey of India ajanga map nung Assam aser Meghalaya na arrtsü ano melatet ta shia lir,” ta paisa ashi.
Laloo-i ashiba agi, Meghalaya aser Assam Chief minister na, 1971 aser 2010 na tsüngda arrtsü dak sendakba tebilemtsütem lemteptsü asoshi 19 ben ajurutepa liasü. Maneni Chief secretary jenjang nunga 1992 aser 2012 na tsüngda 9 ben, aser State anaprongla nungi nodal officer tem tsüngda 2012 nungi 2014 tashi nung 3 ben ajurutepa liasü, saka arrtsü nung mangatettep adoka aliba ken o asoshi kecha telemtetba tajung ka magitet.
Tang tashi nung Sorkar-i arrtsü nung aliba tesemtem terenlok asoshi sen crore 36-bo indokogo. “Iba sen mangatettep adoka aliba tesem renlokdaktsütsü asoshi indokba lir, aser künübo iba li Meghalaya dangi meyipa arutsü imlar,” ta pai shisem.
Taoba mapang CM Donkupar Roy-i iba o lemtepba nung shilem agidang ashiba agi, arrtsü nung mangatettep adoka aliba tesemtem India map nung Pakistan-i mekazüka aliba Kashmir ama sentsü balaka nung inoktsütsüla.