Meghalaya MLA puogo; Bodhbarnü longkak aittsü

Guwahati, January 09 (Agencies): Tesüiba hopta asem tsüngda Meghalaya nung tashiyim amshia tetsür raksatsüba ken o balala ajanga state maaksütsüogo, aser item ken o dak sentakba nung MLA ka densema nisung 12 pua jail nung puoka lir.
Police-i maneni aibelenertem bushidar iba den külemi item tatalokba atema Bodhbarnü state yimtiba, Shillong nung melungtet telok aser lokti tentet balalai longkak aitba sentong ka ayongzüka lir.
Shillong nung tashiyim amshia tetsür raksatsüba atema December 16 nü ken o benoka liasü aser iba ken o nung Hokolbarnü Guwahati nung Independent MLA, Julius Kitbok Dorphang apu, ano kasa ken o nung nisung tenet pua aliba rongnung guest house nung waiter tetsür ka densema lir.
Meghalaya State Commission for Protection of Child Rights (MSCPCR) chairperson, Meena Kharkongor-i, “Iba ya tetsürtem shibelenba maparen ka lir amai reprangteter. Arishi küm 14 tetsürlaji East Khasi Hills district nung aliba yim ka nungi sensaker kibong ka nungi kasa yimtsür kati anir aru, aser tetsür ka tenüng agi, Mamoni Parveen ket nung agutsü. Iba sülen lai lar kidang mapa inyakdaktsüba den külemi guest house balalai yoka liasü” ta ashi.
Tetsürla jagi tasüieta report agutsüba sülen ang iba maparen jungkai adoker,” ta laisa ashi.
Iba ken o nung Meghalaya SCPCR-i FIR ana agutsüogo aser Shillong nung amenoka aliba Civil Society Women’s Organisation (CSWO)-i FIR asem benoka lir.
Taoba mapang telungpur, Dorphang ya 2013 küm MLA akum, aser tawa pa anema police-i ken o balala benokba süken pa jenshia liasü.