Meghalaya nung Agnes Kharshiing dak teka sangshiba aitsür

Shillong, Yimpoksüi (November) 9 (Agencies): Brihostibarnü East Jaintia Hills district nung social activist Agnes Kharshiing aser Anita Sangma na dak teka sangshiba khukhua aitsür ta Thma u Rangli Juki (TUR)-i metetdaktsü.
Agnes Kharshiing ya ozü medemer aser yariteper ka lir aser lai sensakertem aser tangar memenepertem atema noktaker. Lai lipoküm wazüka ayutsü aser mapa inyakertem temeten kümzüka ayutsü atema mapa inyaker, ta Meghalaya nung workers’ unions 13 lokteper tentetba Workers Power of Meghalaya-i metetdaktsü.
“Meghalaya nung anti-corruption human rights activist tongtipang ka dak teka sangshiba ajanga state nung aliba mafia tem ya yimten tashi agi awabanga lir ta sayur. National Green Tribunal (NGT) tetuyubatem liaka Meghalaya nung ozüng alema nakmati atuba mapa Agnes-i tuteta yimjak nung metetdaktsü” ta Coordinator, TUR, Mantre Passah-i ashi.
Iba lendong ya ajungbena atalokba masü saka tasa atonger inyakba ka liasü, kechiyong kasa district nung Right to Information (RTI) activist Poipynhun Majaw tepset aser iba ken o atema temeten ano mangu lir, ta paisa shisem.
“Meghalaya nung tashi alirtem anema ola adokertem tsübudaktsütsü aser azüoktsü merangba mapa kanga bulua inyaker. Agnes Kharshiing-i ochimashi anema rarar aser iba ya la kija indang rara masü aser la indang ola kodanga menembangtettsü” ta Workers Power of Meghalaya (WPM)-i sangdong nung metetdaktsü.
Parnokisa sorkar dang aibelenertem aputsü takhangba agütsü aser Kong Agnes o lar medemer na tekaraba nung taneptsü angutsü moatsür ta metetdaktsü.
“Onoki Meghalaya tajungba kümdaktsütsü atema inyaktsü. Onoki takok mangu tashi raratsü” ta WPM president Angelina Hynniewta aser WPM secretary Kenneth Swer nati ashi.
Iba lendong nung Agnes Kharshiing kanga mejungi yirur North-Eastern Indira Gandhi Regional Institute of Health and Medical Sciences nung anepaludar.
Hokolbarnep Meghalaya Police-i sangdong ka metetdaktsüba nung Kharshiing aser la den yariteper ka Anita Sangma dak ozüng alema inyaker telok kati teka sangshi ta shia lir.
Iba dak sendakba nung police-i nisung ana pua lir ta ashi saka iba dak talila osang kecha memetetdaktsü.
“Onoki tena dang asüngdangya südar” ta East Jaintia Hills nung police ketdangser Sylvester Nongtnger-i ashi.