Meghalaya nung BJP züngsem 5,000 party toktsü

Tura, June 08 (Agencies): Centre-i nashi tepseta ayoktsüba nokdanga ozüng tasen ka yangluba anema Meghalaya nung Bodhbarnü BJP party züngsem parnok 5000 dak temai party toktsüogo.
Party toktsürtem rongnung Tura city BJP youth wing tir Wilver Greham Danggo densema liasü. Pai ashiba agi, Centre nung BJP-i aniba National Democratic Alliance sorkari nashishi achiba lokti aser tribal tem tashiyim agi amokbanga ayutsü merangba anema nokdaktsü atema parnok party toktsü.
Danggo-i ashiba agi, BJP mandal committee 5 loksaogo aser lanur züngsem 5000 dak tali party toktsüogo.
“Onoki ozü nübur tangatetba aser tamangba den masayatettsü kechiyong parnoki onok dak temolung alemer aser onoki tamangba yimsü aser politics na BJP pur ama memeyokteper. Nisung kari mesüra tesem kari ozü nübur tangtetba yirutsüra aji onok anema asütsü.. Onoki ozü li kümzüka ayutsü,” ta paisa ashi.
Meghalaya BJP nung tongtibang lenir Bachu Marak aser Bernard Marak nata anogo isheka tejakdang party toktsüogo.
Taoba hopta BJP lenir kari, Centre sorkari nashi tepseta ayokba nung ozüng tasenbaji magienra party toktsütsü ta amokmeren.
“Meghalaya nung ozüng tasenba ya BJP lenir aikati magizükteter kechiyong iba ajanga nüburtem dak kongshir,” ta BJP Vice President John Antonius Lyngdoh-i ashi.
“Onoki iba ozüng tasenba magizükteter. Onoki onok chia ajemba ren anema motettsü. Ajidang masü iba ajanga nashi tepseta ayokertem senotsü ren nung timtem adokdaktsür,” ta paisa ashi.