Meghalaya nung bomb tesashi ka apok; 7 yiru

Shillong, January 9 (Agencies) : Honibarnü Meghalaya kübok East Garo Hills nung IED tesashi ka apokba lendong nung tetsür ka densema nisung 7 yiru, ta police-i metetdaktsü.
Iba bomb ya Williamnagar bazaar nung yi ayokba dokan ka anasa apok. Teyirurtemji civil hospital nung anepaludar, ta Inspector General of Police (Operations) G H P Raju-i osangbener dang ashi.
GNLA züngsem aser Williamnagar “command”, Ajan Ch Momin (Jimmy)-i par züngsemtem dang iba bomb pokdaktsütsü tetuyuba agütsü, ta paisa ashi.
Tanü anüngdang 12:45 ako meta improvised explosive device (IED) tesashiji apok aser iba ajanga yi ayokba dokan shilem ka poksatsü aser nisung 7 yiru, ta Raju-isa metetdaktsü.
Paisa ashiba agi, police-i iba tesem nungi GNLA telungpurtem meindoktsü atema mapa tuluba inyaktsü.
GNLA ya 2010 küm nungi Garo Hills region nung telungpur telok ka lir aser iba teloki nisung apuba, tashiyim agi sen saruba mapa inyakba den civilian aser sepaitem tepseter.
GNLA chairman ji Champion Sangma lir aser pa ya taoba mapang police ketdangser ka liasü. Pa ya Shillong jail nung puoka lir aser tang GNLA commander-in chief Sohan D Shira ketdangsüba kübok parnoki inyaksangshir.
Meghalaya kübok Garo Hills region nung telungpur telok 10 shi ka lir.
Williamnagar bomb lendong atema police-i Garo National Liberation Army (GNLA) telok nem tai tongloktsüba mapang Achik Matgrik Army(AMA) ta ser telungpur telok kati iba mapa inyak ta tenüng agia sangdongogo.
Facebook nung AMA-i ashiba agi, parnoki arishi küm 11 teküpok tanurtem dang yi mayoktsü tetuyuba agütsüba sülen anidaktsü atema iba bomb pokdaktsü.
Parnoki iba tesem nung yi ayokba tesemtem dang ita ana (November & December) tsüngda mapa inyaktsü tetuyuba agütsüogo aser tanü bomb pokdaktsübaji parnok tashi sayuba dang liasü, ta AMA Ampati Area Commander, John Lesly Sangma-i shia lir.
“Onoki yi ayokba dokan ka dak dang tenük yokerba masü saka tanur dang yi ayokertem ajak merenshitsü. 2016 küm onoki iba tebilemtsü azüoktsü aser iba ya ozü telok atema dang masü lokti ajungtsü atema lir” ta Sangma-isa Facebook nung metetdaktsü.