Meghalaya nung Congress-i menden teimba nguaka sorkar mekümteter

Shillong, Metsüremi (March) 3 (Agencies): Küptoknü (Honibar) Meghalaya nung Congress-i menden teimba nung takok angu saka sorkar akümtsü atema menden peria mongutet.
Taküm assembly election Congress-i menden 21 nung takok nguteta liasü aser parnok sülen National People’s Party (NPP)-i menden 19 nung takok angu. BJP-i menden 47 nung toktep saka parnoki menden 2 nung dang takok ngutet.
Taoba ita Nationalist Congress Party (NCP) candidate ka tepsetba ajanga Tsüklai (February) 27, 2018 nü Meghalaya nung assembly menden 59 atema dang polling agia liasü.
Tang Meghalaya nung sorkar akümtsü atema party mesüra teloktep kati menden 30 bosa nüngdak. Taküm election nung Congress-i telok shinga dena tesentaktep melii dang toktep aser BJP-ia Mukul Sangma’er sorkar atsüngdoktsü atema merangaka, party ka den danga menden lemsateptsü tenangzüptep maliasü.
Ajisüaka, NPP ya Centre aser Manipur nung BJP den yaritepba telok lir.
“Onoki sorkar akümtsü akok ta imlar. Nübortemi ochimashi Congress sorkar agi laktetogo aser temelenshi ka aginür” ta NPP tekolak Conrad Sangma-i osangbener dang ashi.
Tang nisung ajaki Meghalaya nung regional party tem aser independent candidate temi kechi telemtetba agir ta tenük yoker.
Taküm election nung United Democratic Party (UDP)-i menden 6 nung, People’s Democratic Front (PDF)-i menden 4 nung aser Hill State People’s Democratic Party (HSPDP)-i menden 2 nung takok nguogo. Ano, Khun Hynniewtrep National Awakening Movement aser Nationalist Congress Party nati menden ka ka nung takok angu.
Independent candidate 3-ia takok angu aser UDF aser HSPDP na election magidang yongi tesentaktep yur toktep.
Tanü votes tezüngdak nung Congress-i tongti lennirtem- Ahmed Patel, Kamal Nath aser Mukul Wasnik nungertem Meghalaya-i yokogo aser külen BJP-ia parnok lennir aser North East Democratic Alliance convenor Himanta Biswa Sarma yokogo.
Goa aser Manipur nung Congress yimpazüa alidang BJP-i aniba sorkartem kümdaktsü ta nisungtemi aitsür aser iba jagi tanü Congress-i lennirtem Meghalaya-i yok.
Manipur aser Goa nunga telok shingaia sorkar akümtsü atema menden peria mongutet aser BJP-i tanga party tem den independent candidate tem teyari agia sorkartem kümteta liasü. Ajisüaka, tangbo yamaji matalokdaktsütsü, ta Ahmed Patel-i ashi.
“Onoki sorkar akümtsü. Meghalaya nung alirtemi aginübaji ozü Congress sorkari sayutsü. Onoki ajak den tongtepdar aser tangaria onok den osang agitepdar” ta Kamal Nath-ia ashi.
“BJP-i tetsükdaktsü ajurudaktsütsü atema sen tashi amshir,” ta Nath-i BJP dak tai tongloktsü.
Chief Minister Mukul Sangma-i menden ana nungi takok angu aser Congress-i sorkar akümtsü atema imlar ta pai ashi.
“Onoki sorkar akümtsü atema regional party aser Independent tem den jembidar” ta Meghalaya state Congress working president Vincent H. Pala-ia osangbener dang ashi.
Tang India kübok Congress-i sorkar kümteta aliba state pungu rongnung Meghalaya ka liasü aser tanüngba state temji- Punjab, Karnataka, Mizoram aser Puducherry lir.