Meghalaya nung Congress MLA kari CM Sangma anema apusor

Shillong (Meghalaya), June 04 (Agencies): Arunachal Pradesh yimtenren nungi tatishitsü agia Congress bangdak lenirtemi tang Meghalaya nung yimtenren tensa junga mita reprangdar, kechiyong sorkar tashi nung aliba Congress MLA kari Chief Minister, Mukul Sangma anema apuso tenzükogo.
Osangbener den jembidang Sangma-i, “Onoki kanga kümküma nisung ajak mera mita reprangdar. Onoki iba ya pungbapungba magitsü, kechiyong Congress sorkartem loksadaktsütsü atema BJP densema telok balalai shilem agia inyakba tatalokbatem lir. Onoki ibaji Arunachal Pradesh aser Uttarakhand na nungi nguogo,” ta ashi. Taküm February ita nung Arunachal Pradesh nung Nabam Tuki’er sorkar loksadaktsüba nung BJP-i shilem tulu agia liasü.
Meghalaya yimtenren puti otsü nung, iba state ya yimtenren anokshia dang aliba otsü lir.
Taoba mapang state Chief Minister Salseng C Marak-i pa kümsük ka (küm pongu) khen abensa inyaka lir, iba dakji alaka Chief minister kati-a kümsük abensaa inyaka mali.
Tang state nung Arunachal Pradesh nung atalokba ama kasa tensa ajurushia lir, ajisüaka yangibo BJP MLA kata mali. Züngsem 60 aliba Meghalaya Assembly nung Congress Party MLA 30 lir.
Sangma-i, tongti lenir onükji lemtetogo ta ashi saka Meghalaya Pradesh Congress Committee Tir aser taoba mapang chief minister, D D Lapang-ibo, iba telemtetbaji AICC nung agitsü, ta shiogo.
BJP nungi amokmeren atema State Congress-i Sonia Gandhi aser Rahul Gandhi na dang teyari meshi ta osang jembibaji tai ta Sangma-isa jangjatsüogo.
Iba shidiji Ato kilonser, Narendra Modi-i Shillong semdangba sülen anogo ana lir zülu. Sangma-i, par sorkari amokmeren ajurua mali, ta ashi.