Meghalaya nung Congress pur ken o tamajungba akümer

Shillong, September, 04 (Agencies): Meghalaya Pradesh Congress Committee (MPCC) puri Pynursla constituency nung Block Congress atongsatsüba atema ajungbena telemtetba agiba sülen Pynursla Block Congress Committee (PBCC) Executive Committee nung taoba züngsemtem taruba jenjang kechi agitsü ibaji lemteptsü atema Mongolbarnü senden ka akatsü.
“Kecha kuli tejangja ka makai MPCC puri block committee atongsatsüba atema onok süngmanger. BCC koba MPCC puri adongsatsü iba lokti ajanga party anema ta ashitsüsa kecha inyaka mali,” ta taoba mapang PBCC züngsem kati Hombarnü metetdaktsü.
Paisa ashiba agi, MPCC puri H Khongtani tir asütsü asoshi shimba ya tesüngmangtsüka lir kechiyong pa party nunga züngsema masü.
Parnok party tanga kar nung adentsü asoshi sentong ali mali ta asüngdang dang, taoba mapang züngsem kati langzüba agi parnok tanga party nung adentsü asü madentsüra iba telemtetbaji Mongulbarnü ang agitsü.
“Onoki iba amala telemtetba tongtibang ka magi tsüngda local MLA, Prestone Tynsong dena sensak asemtsü nüngdaker,” ta paisa ashi.
Taoba mapang nung Congress MLA, Prestone Tynsong-i ashiba agi, party-i PBCC matongsatsü tsüngda pa den kecha mashishitep aser pa dang iba osang Block Congress tir, Emlinstone-i agütsü.
Temetettsü kaji MPCC puri Khongthani dang PBCC nung züngsem tasentem tenüng MPCC nem agütsütsü asoshi metetdaktsüogo.