Meghalaya nung Dimapur nungi prangpong-injang shibelener 2 apu

Shillong, February 28 (Agencies) : Garo National Liberation Army (GNLA) telungpurtem dangi prangpong-injang shibelener nisung ana Meghalaya police-i apu.
Osang tejangja kar angazükba sülen Hokolbar aonung East Garo Hills district kübok Baija tesem nung police-i gari ka mita reprangdang 7.62 sniper injang rounds 180 bena liasü, ta Inspector General of Police (Operations) G H P. Raju-i osangbener dang ashi.
Prangpong-injangtemji Nagaland kübok Dimapur district nungi Rajiv Sangma aser Malstone Sangma nati bener aru. Tena ya Meghalaya police-i aputsü atema bushia liasü, ta Raju-isa ashi.
Parnoki Dimapur nungi Assam adena Garo Hills-i prangpong-injangtem bener aru aser itemji GNLA atema liasü. Onoki tena dang asüngdangya südar, ta Meghalaya nung Inspector General of Police (Operations)-isa metetdaktsü.
Ano, Honibarnü Meghalaya police-isa South Garo Hills district kübok Nengsangre yimdak school ki ka nungi AK rifle ka, mobile phone ka aser taitsü aketba kaket kar ngutetogo.