Meghalaya nung drugs ayokertemi ‘Powdered Puffed Rice’ ajanga ashioktsür

Shillong, September 30 (Agencies): Meghalaya police-i Twitter nung Rasna indang osang ka sangoktsüba ajanga nisung aika peladakja liasü aser tang parnoki ‘puffed rice’ indang osang ka sangdongogo.
September 26, 2019 nü Meghalaya police nung ANTF telok kati gari ka soter mita reprangdang sapong taseptsü 25 nung “powdered puffed rice” seret 750 tashi heroin ama ayoktsüba bena aliba apu.
“Rasna tatalokba sülen Jang. ANTF East Jaintia Hills-i gari ka nung heroin ama ayoktsü abenba “Powdered Puffed Rice” ngutetogo. ANTF nem tenüngsang agütsür” ta Meghalaya Police-i Twitter nung iba osang lemsatep.
“Osang tejangja ka angazükba sülen, Silchar nungi aruba gari ka soter mita reprangdang powder temesüng bena aliba angu. Onoki ibaji heroin-a ta bilemer tendangdang heroin masü saka jang menüngba liasü ta bushitet” ta Superintendent of Police, East Jaintia Hills Vivekanand Singh-i osangbener dang ashi.
“Onoki gari den driver aser tangar ka apu saka tena Narcotic Drugs and Psychotropic Substances Act kübok tai metongloktsütetba agi chiok” ta Singh-isa ashi.
August 15, 2019 nü Meghalaya Police-i state nung drug manguba indang osang ka lemsatepdang ‘drug ayokertemi Rasna powder agüja talirtem ashioktsür’ ta ashi.
Temenünütsü saka tetezü keta aliba osang lemsatepba atema state nung alirtemi Meghalaya Police nem tenüngsang agütsü aser nisungtemi drug addict temji ‘Rasna Ripped’ ta shia asayateptsü tenzük.