Meghalaya nung HNLC-i wako & temzüng balaka meshir

Shillong, November 26 (Agencies): NSCN (IM)-i akhangba ama Meghalaya nung Hynniewtrep National Liberation Council (HNLC)-ia Khasi nunger atema wako aser temzüng balaka ayutsü takhangba agütsüogo.
HNLC-isa parnok indang ‘Parliament’ aser ‘Supreme Court’ balaka ayutsü akhanger.
HNLC general secretary-cum-publicity secretary Saiñkupar Nongtraw-i Facebook nung ashiba agi “New Delhi-i nübo tajemba aliba kintem den meputep ozüngtem yangluba Khasi nungeri mamatsüla.”
“Nenoki ILP (Inner Line Permit) meshidang sorkari CAB (Citizenship Amendment Bill) agütsü. VAB (Village Administration Bill) meshidang tang sorkari municipal election aginür” ta paisa metetdaktsü.
Centre-i HNLC telok mokdangba sülen anogo ishika lir iba osang ya sangoktsüogo.
Meghalaya nung ozüng alema mapa inyaker ta tai tonglokja Ministry of Home Affairs (MHA)-i HNLC telok mokdang.
“New Delhi-i tashiyim agi inyakba ajanga Khasi nunger dak sendakba onüktem ateam lungkak aitba manener. HNLC-i Hynñiewtrep state atema maneni raratsü” ta Nongtraw-isa ashi.
“India indang Parliament, Flag, Constitution aser Supreme Court lir, anungji Khasi nungera Parliament, Flag, Constitution aser Supreme Court balaka alitsüla. Iba atema KNLC-i rarar” ta paisa ashi.
Jaitbynriew (lisopur kintem) India küboksa ali tashi Khasi lisopurtemi kodanga temetentem mangutsü, ta Nongtraw-i metetdaktsü.
“Onoki inyakba mapa ajanga Khasi lisopurtem indang khuret ajakbo mekoktettsü saka asen nübor temetentem meyipa angutsü atema onoki maneni prangpong amer raratsü” ta paisa shisem.