Meghalaya nung hopta ana atema nashishi mangutsü

Shillong, January 19 (Agencies) : Taruba hopta ana Meghalaya nung nashishi mangutsü kechiyong shilepertem aser nashishi ayokertemi Bangladesh dangi nashi miima belenba anema hopta ana lungkak aittsü.
2015 küm sen crore 3 shi alangba nashi 2,079 apu aser India-Bangladesh arrtsü nung ozüng alema nashi belener nisung 18 tashi apu, ta Border Security Force (BSF)-i osnag metetdaktsü.
Hombar nikongtsütsü nungi nashi shi ayokba dokan ajak shibang aser iba lungkak aitba sentong ya February 3 nü tembangtsü.
Meghalaya sorkari Bangladesh dangi ozüng alema shiruru belenba mapa menoktangtetba sülen Khasi Jaintia Butchers Welfare Association (KJBWA)-i iba lungkak aitba sentong agitsü telemtetba agi.
Küm aika Bangladesh leni ozüng alema shiruru belenba mapa inyaka arur aser iba ya ajanga Bangladesh aser Assam o Meghalaya nung temelaba maliba shishilembartem kanga tajangzük angur.
BSF-i Bangladesh den arrtsü nungi anogoshia nashi aser tanga shirururtem apur. Tawa tua Meghalaya Police-i nashi 126 apu aser iba ya ajanga ozüng alema shiruru belenba kanga bulua inyaker.
“Anogoshia Bangladesh leni jara maliba tesem aser ayong tilatem ajanga nashi belener” ta Border Security Force spokesman Sushil Kumar Singh-i osangbener dang ashi.
Union Home Minister Rajnath Singh-i parnok dang iba timtem noktangtsü tetuyuba agütsüba sülen BSF aser Border Guard of Bangladesh tsüngda inyakyim tasen kar atonga inyaker, ta Sushil Kumar-isa ashi.
“Bangladesh nung nashi kanga alizükba agi Khanapara nung nashi indang jenjang kanga ajungketogo. Ozüng alema belenba nashi ana sen 65,000 nungi 70,000 tashi ayoker aser nashi tajung süra sen lakh ka shi kati yokdoker” ta Warlarpih-i ashi.
Bangladesh-i nashi meina aoertemia nashi ka atema sen 600 agir aser Khanapara market nungi truck gari nung nashi bener aoertemi nashi ka nung sen 8,000 nungi sen 10,000 taa meshir, ta paisa ashi.
“Iba inyakyim ajanga onok hopta nung sen 40,000 nungi 50,000 tsüngda takoksa ajurur. Iba khuret ajanga onok külem züngsem karbo nashishi melena akshi ang ayoktsü tenzükogo” ta Warlarpih-isa metetdaktsü.
Indian Custom ketdangsertemi ashiba agi, küm shia India nungi Bangladesh-i ozüng alema nashi belenba inyakyim nung sen crore 1,000 den timba amshir.